காந்தியைக் கண்டு ஓட்டம் பிடித்த பிரபாகரன் - விமரிசனம்’ முதல்வர் மகா ஏமாத்மா’

    ஆயுத பலத்தைக் கொண்டு உலகத்தையே வெற்றி கொண்டுவிடுவதைவிட, உள்ளுக்குள்

இருக்கும்காமக்குரோதஉணர்ச்சிகளை வென்றுவிடுவது அதிகக்கஷ்டமாக எனக்குத்தோன்றுகிறது
                                       - தனது சத்திய சோதனையில் ’வெறும்’ காந்தி

இந்த அருமையான் ஸ்டில் நடிகர் கபீர்பேடியின் ட்விட்டரில் சுட்டது

நாங்கல்லாம் துப்பாக்கிய தூக்க ஆரம்பிச்சா’-காந்தி

மீதிப்பரிச்சையை நான் பிட் அடிச்சாவது எழுதாம மேலோகம் போக மாட்டேன்

  சற்றுமுன்னர்தான் ஃபோர் ஃப்ரேம்ஸ் பிரிவியூ தியேட்டரில்,’முதல்வர் மகாத்மா’ படம் பார்த்துவிட்டு வந்தேன். ஏற்கனவே ‘காமராஜ்’ படம் எடுத்து,பெருந்தலைவர்  காமராஜர் மேலிருந்த மதிப்பை கணிசமான அளவில் காலி செய்திருந்த அதே பாலகிருஷ்ணன் தான், இப்ப காந்தியையும் கையில் எடுத்து, எழுதி, இயக்கி தயாரித்து வியாபாரித்தும் இருக்கிறார்.

ஸ்கூல் பசங்களின் நாடகம் போல என்று இப்போதெல்லாம் எழுத பயமாக இருக்கிறது.ஏனென்றால், ஸ்கூல் பசங்க பல விதங்களிலும் நம்ம கோடம்பாக்க ஆசாமிகளை விட ஷார்ப்பாகவே இருக்கிறார்கள். ஸ்கூல், காலேஜ் நாடகங்கள், இங்கே வருஷத்துக்கு ரிலீஸாகும் 90 சதவீத பிணாத்தல் படங்களை விட நன்றாகவே இருக்கின்றன.

நாம பாலகிருஷ்ணனின் ‘முதல்வர் மகாத்மா’வுக்கு வருவோம்.

கோட் ஷேவால் சுடப்பட்டு மேலோகம் போய்க்கொண்டிருக்கும் காந்தி, நடுவழியிலேயே முரண்டு பிடிக்க ஆரம்பித்துவிடுகிறார். நான் இந்தியாவுக்காக பாதிப்பரிட்சை தான் எழுதியிருக்கேன்.இன்னும் கொஞ்சம் மக்களை டார்ச்சர் பண்ண வேண்டியிருக்கு, அதனால பூலோகத்துக்கு உடனே ஒரு ‘ரிடர்ன்’ டிக்கட் போடுங்க’ என்று எமனிடம் அடம்பிடித்து, வழக்கம் போல் அவனிடமும் உண்ணாவிரத டார்ச்சரைக் கையாண்டு பழையபடி பூமிக்கே வந்துவிடுகிறார்.

அப்படி வந்தவர், கரம் சந்த் காந்தி என்பதை மறைத்து, தனது பெயரில் மோகன் தாஸ் என்பதை மட்டும் வைத்துக்கொண்டு, பழையபடி மக்களுக்காக போராட ஆரம்பிக்கிறார்.

இறுதியில், வெள்ளைக்காரர்களைவிட, இப்போதிருக்கிற அரசியல் கொள்ளைக்காரர்கள் அதி பயங்கரமானவர்கள் என்பதைப்புரிந்து கொண்டு ‘ரிடர்ன் டிக்கட்டை கேன்சல் செய்து கொண்டு அவசர அவசரமாக மேலோகம் பறக்கிறார்.

என்ன கதையில் இன்னும் முதல்வர் வரவில்லையே என்று பார்க்கிறீர்களா?

மேற்படி கதையை, அவரிடம் பயின்று ஒரு மாநிலத்தின் நல்ல முதல்வராக இருக்கும் அனுபம் கேர் ,அனுபவம் கேராக மாறி சொல்லி வருகிறார்.மகாத்மா காந்தியிடம் பயின்று முதல்வரானதால் ‘முதல்வர் மகாத்மா’.

படம் முடிந்து வெளியே வந்தவுடன், வாசலில் வழிமறித்து நின்று கொண்டிருந்த இயக்குனர் பாலகிருஷ்ணனிடம்,’’ பொதுவா எடிட்டருக்கு அனுப்பி, படத்தை எடிட் பண்ணினதுக்கு அப்புறம் தான் பிரஸ் ஷோ வே போடுவாங்க. நீங்க ஷூட்டிங் முடிஞ்சி டெவலப் பண்ணுன உடனே அப்பிடியே எங்களுக்கு போட்டு காட்டீட்டிங்களே சார்? என்று கேட்க தொண்டை வரை வார்த்தைகள் வந்துவிட்டன.

இன்னைக்கி காலைல ஷேவ் பண்றப்பவே ரத்தக்காயம் பாத்தாச்சி, மறுபடியும் எதுக்கு ரிஸ்க் என்று அதை மென்று தின்றுவிட்டேன்.

எடிட்டிங் மட்டுமின்றி படத்தின் அத்தனை அம்சங்களுமே, தொழில் நுட்பமா அப்பிடின்னா என்னாங்க என்று நம்மை பகடி பண்ணி கபடி ஆடுகின்றன.

இந்த விநோத கற்பனையின் உச்சக்கட்டமாக , விடுதலைப்புலிகளின் தலைவர் மாவீரன் பிரபாகரனும், காந்தியும் ஒரு கடற்கரையில் அவசர அவசரமாக சந்தித்துக்கொள்கிறார்கள். பிரபாகரனுக்கு காந்தி அஹிம்சையின் அவசியத்தைப்பற்றி வண்டி வண்டியாக அட்வைஸ்களை அள்ளி வழங்குகிறார்.

யாராவது ரொம்ப அறுக்கும்போது, நமக்கு நாமே மிஸ்டு கால் கொடுத்து  எதிரில் இல்லாத ஒரு ஆளிடம், ‘ஹலோ ஸாரிம்மா லேட்டாயிடுச்சி.அஞ்சே நிமிஷத்துல அங்க இருப்பேன்’ என்று சொல்லாமல்கொள்ளாமல் எஸ்கேப் ஆவோமே, அதே போலவே ஒயர்லெஸ்ஸில் ஒரு கால் வர காந்தியிடமிருந்து அவசரமாகத் தப்பி ஓடுகிறார் பிரபாகரன்.

எல்லோருக்குமே, சில பிடித்த தலைவர்கள் இருப்பது மாதிரி, சில பிடிக்காத தலைவர்களும் இருப்பார்கள்.

அப்படி உங்களுக்கு  மட்டும் பிடிக்காத ஒரு  தலைவரை, எல்லாருக்கும் பிடிக்காத தலைவர் ஆக்க விரும்பினால், கொஞ்சமும் யோசிக்காமல் உங்க காடுகரையை வித்தாவது, பாலகிருஷ்ணர டைரக்டரா வச்சி படம் எடுங்க.அப்ப பாப்பீங்க கைமேல் பலனை.

எம்பொண்டாட்டி மகளே... எனக்கு நீ மருமகளே...

உங்கள் நண்பர்கள், உற்றார் உறவினர்களில் நீங்கள் பழிவாங்கவேண்டிய பட்டியல் ஏதாவது இருக்கிறதா?

அப்படியானால் அவர்களுக்கு ‘மாசி’ படத்துக்கு டிக்கெட் எடுத்துக்கொடுத்து, பிரியாணி பொட்டலமும், குவார்ட்டரும் வாங்கிக்கொடுத்து,  முழுப்படத்தையும் பார்க்கிறார்களா என்று தியேட்டர் வாசலில் காத்திருந்து கன்ஃபர்ம் பண்ணுங்கள்.

அவர்கள் மீது உங்களுக்கு இருந்த ஆத்திரம் அப்படியே பரிதாபமாக மாறிவிடும். அவர்களுக்கு, நான் சொல்லமலேயே,வீடு வரை போக ஆட்டோவுக்கும் காசு கொடுத்து அனுப்பி விடுவீர்கள்.

சரி, விமர்சனம் என்று வந்த பிறகு கதை என்ன என்று எழுதாவிட்டால் ,இவர் படம் பாக்காம தூங்கிட்டாரோ என்று நீங்கள் பழி சொல்லக்கூடும் என்பதால்,விதிப்படி, கதைக்கு வருவோம்.

அர்ஜுன் ஒரு நேர்மையான போலீஸ் ஆபீசர்.அவர் நேர்மையாக இருக்கவிடாமல் அரசியல்வாதியாக இருக்கும் ரவுடிகளும், ரவுடிகளாக இருக்கும் அரசியல்வாதிகளும், மேற்படி ரெண்டுமாகவே இருக்கிற டைரக்டர் கிச்சாவும் தொந்தரவு செய்கிறார்கள்.

அவர்களை முதல் பாதியில் போலீஸாக இருந்து, இரண்டாவது பாதியில் பொறுக்கியாக இருந்து, பாட்டி வடை சுட்ட மாதிரி அர்ஜூன் சுட்ட கதைதான் ‘மாசி’ எனப்படும் படத்தின் பாசி படர்ந்த கதையாகும்.

படத்தின் முதல் காட்சியிலேயே பிச்சைக்காரன் போல் ஒருவனால் சுடப்படும் அர்ஜுனின் நினைவலைகளுக்கு போகும் டைரக்டர், அடுத்த ஷாட்டிலேயே ஹீரோயின் அர்ச்சனாவின் தொப்புளுக்கு க்ளோஸ் அப் போட்டு படுக்கையறை காட்சியில் பயணிப்பதிலிருந்து, அம்மாவுக்கு எல்லோரும் சேலை எடுத்துக்கொடுத்துதான் மகிழ்விக்கிறார்கள் அதை மாற்றி சட்டை எடுத்துக்கொடுத்து மகிழ்விப்பது என்று ஏகப்பட்ட அதிர்ச்சிகளை படம் நெடுக வைத்திருக்கிறார்.

அதிலும் கலாராணி என்கிற 25 பெண் சிவாஜிக்கு, மம்மி மாண்டேஜ் பாடல் வைக்கிற கல் நெஞ்சமெல்லாம் டைரக்டர் கிச்சாவுக்கு எப்படி வந்தது என்று புரியவில்லை. தற்போது செக் மோசடி வழக்கில் புழல் சிறையில் உள்ள கிச்சாவை அடுத்து படம் எதுவும் இயக்க மாட்டேன் என்று எழுதி வாங்கிக்கொண்டு ரிலீஸ் பண்ணுவது தமிழ் சமூகத்துக்கு பாதுகாப்பானது என்பது என் தாழ்மையற்ற கருத்து.

இதற்கு மேலும் இந்தப்படத்தைப் பற்றி எழுதி உங்கள் பொன்னான நேரத்தை வீணடிக்க விரும்பவில்லை.  மாசி’யின் பாடி ரெண்டு மூனு நாளுக்கு மேல் தாங்காது என்பதால். முதல் பாராவில் சொன்னபடி எதிரிகளின் பட்டியலைக் கையில் எடுத்துக்கொண்டு உடனே செயலில் இறங்குங்கள்.

$$$$$$$$$$$$$$$

என் குறிப்பு 2: தமிழ்மணத்தின் சிறப்பு விருந்தினர் ஆசனம் எனக்கு கிடைத்த ஒரு அருமையான வாய்ப்பு என்றுதான் சொல்ல வேண்டும். இதன் முதல் கட்டுரையில் நான் வாக்களித்திருந்தபடி சமையல் குறிப்பு எழுத மட்டும் சமயம் அமையவில்லை. ஆனால் ஒரு புதிர் போடுவதாக சொன்னேன்.
அந்த புதிரைப்படிப்பதற்கு முன் ஒரு சின்ன நிபந்தனை.

இந்தப்புதிரை விடுவிப்பவர்களுக்கு என் சொத்து மொத்தமும் எழுதி வைக்கிறேன் என்று நான் ஹெவி ரிஸ்க்’ எடுத்திருப்பதால், ஐசிஐசிஐ கார்டுகளில் படிக்க முடியாத சைஸுகளில் பல நிபந்தனைகள் வருமே அது மாதிரி இரு நிபந்தனை மட்டும் வைக்கிறேன்.

1. இந்தப்போட்டியில் என் சொந்த ஊரான நல்லமநாயக்கன்பட்டி, மற்றும் அருகாமையில் இருக்கிற என் உறவு கிராமங்களான உசிலம்பட்டி, புல்லலக்கோட்டை ஊர்களைச்சேர்ந்தவர்கள் கலந்துகொள்ளக்கூடாது.

2. மேற்படி மூன்று ஊர்களிலும் அடுத்த பதினைந்து நாட்களுக்கு  புதிய மனிதர்கள் நடமாட்டம் இருக்கக்கூடாது.

இது உங்களுக்கும் எனக்குமான கே. டி. குஞ்சுமேன் ஜெண்டில்மேன் அக்ரிமெண்ட்.

சரி இப்ப புதிருக்கு வருவோம்.

ஒரு அழகிய இளம்பெண் தன் வீட்டு வாசலில் கோலம் போட்டுக்கொண்டிருக்கிறாள். அப்போது அந்தப்பகுதி வழியாக சைக்கிளில் வரும் ஒருவர் அந்தப்பெண்ணைப்பார்த்து கீழ்க்கண்டவாறு சொல்லி விட்டுப்போகிறார்....

‘எம்பொண்டாட்டி மகளே... எனக்கு நீ மருமகளே... உங்க அப்பன் வந்து கேட்டா... உன் புருஷன் வந்துட்டுப் போனான்னு சொல்லு’


மேட்டர் இவ்வளவு தான்.  இந்த இருவருக்குமான உறவுமுறை என்ன என்பதை நீங்கள் விடுவிக்க வேண்டும்.

இவர்களுக்குள் கள்ள உறவு எதுவும் இருக்குமோ என்று நினைத்து கன்ஃபியூஸ் ஆகிக்கொள்ளாதீர்கள். இருவருமே சமூகத்தில் நல்ல அந்தஸ்தில் உள்ளவர்கள் தான்.

புதிர் போடும்போது ஒரு சின்ன க்ளுவாவது கொடுக்க வேண்டும் என்பது காலகாலமாக நிலவி வரும் நியதி. அந்த வகையில் நானும் ஒரு க்ளு தருகிறேன்.

எனது உள்ளம் கவர்ந்த இசைஞாநியைப்பற்றி இரு தினங்களுக்கு முன்பு எனது ப்ளாக்கில்,’ ராஜா பைத்தியங்களிலேயே ராஜ பைத்தியம் நான் தான்’ தலைப்பில் எனது ப்ளாக்கில் ஒரு கட்டுரை இருக்கிறது. அதில் ஒரு இடத்தில் இதற்கான நல்ல க்ளூ ஒன்று இருக்கிறது.

கோலிவுட்டை ஆளப்போகும் கண்ணே.... கருநிற மண்ணே...

சற்று முன்னர் நடந்த கிரிக்கெட் மேட்சிலும் டோனி அண்ட் கோ தோற்றதும், ஒரிஜினல் கேப்டன் விஜயகாந்த், நாக்கைத்துருத்தி, விழிகளை சற்று வெளியே அனுப்பி, பின் பற்களை கடமுடாவென்று கடித்தாராம்.

விக்கெட்டும் எடுக்க முடியலை, ரன்னும் ஓடமுடியலை. இந்த டோனிப்பயலுக்கு கேப்டன் பதவி ஒரு கேடா? இனிமே கடலுக்கு ஒரு கப்பல், கண்ட்ரிக்கு ஒரு கேப்டன் ‘ என்று அறிக்கை தயாராகிக்கொண்டிருப்பதாக அரசல் புரசல் தகவல். அது கிடக்கட்டும். இன்னைக்கி நம்ம சப்ஜெக்டே வேற. ஆங்..

ஆரம்பத்தில் நம்ம கேப்டன் உண்மையில் ஹீரோ ஆக்க ஆசைப்பட்டது தனது மூத்த மகன் ஜெய பிரபாகரனைத்தான். பெயரைக்கேட்டவுடன் ,சரி ஏதோ பெரிய வீரனுக்குத்தான் கதை சொல்லப்போகிறோம் என்ற நம்பிக்கையில் கேப்டனின் வீடு தேடி வந்து கதை சொல்ல வந்தவர்கள், கேப்டனின் மூத்த வாரிசைப்பார்த்தவுடன்,’’ கேப்டன் . இப்பல்லாம்' animal welfare board' ரொம்ப ஸ்ட்ரிக்டா இருக்காங்க. அதனால யானைய வச்சி சப்ஜெக்ட் எதுவுமே ரெடி பண்ணலை. தப்பா நினைச்சுக்காதீங்க’ என்று தப்பி ஓடினார்களாம்.

அவங்க ஃபீல் பண்றதுல ஒண்ணும் தப்பில்லையே’ என்றபடி பிரபாகரனை உடம்பைக் குறைக்கும்பொருட்டு, கொஞ்ச நாள் வாக்கிங், ஜாக்கிங் போகச்சொன்னார் கேப்டன்.

தம்பி வாக்கிங் போய்த் திரும்புமுன், தெருவிலுள்ள அத்தனை கடைக்காரர்களும்,’’ ஐயா இதெல்லாம் தம்பி வாங்கி சாப்பிட்டதுங்க. வளர்ற வயசு நல்லா சாப்பிட வேண்டியதுதான். அதுக்காக வேற யாருக்குமே யாவாரம் பாக்க முடியாம இவரு ஒருத்தரே எல்லாத்தையும் சாப்பிட்டா எப்பிடிங்க ஐயா? என்று பெரும் பில்லோடு வந்து நின்றார்களாம்.

சரி இது உதவாக்கறை.  இவனுக்கு நடிப்பு சரிப்பட்டு வராது,.எது கிடைச்சாலும் முழுங்கி ஏப்பம் விடுறதால, அரசியல்ல இவன ஆழமா இறக்கி விட்டுற வேண்டியதுதான் ‘ என்று முடிவெடுத்த பின்னரே தன்  இளைய வாரிசு சண்முகபாண்டியனை நடிகனாக்கும் முடிவை எடுத்தார் கேப்டன்.

சண்முக பாண்டியன் தமிழ்சினிமாவை விஜயகாந்துக்கு பதிலாக ஆள வருகிறார் என்றவுடன் எத்தனை கண்களில் கண்ணீர் குளம் கட்டியிருக்கும் என்பதை என் மனக்கண்ணால் பார்க்கமுடிகிறது.

எனக்கு உடனே 1958-ல் வெளிவந்த’ பானை பிடித்தவள் பாக்கியசாலி’ என்ற படத்தில் வரும் ’புருஷன் வீட்டில் வாழபோகும்  பொண்ணே  தங்கச்சி கண்ணே ’என்ற பாடல்தான் ஞாபகத்துக்கு வந்தது. சரி ,தம்பிக்கு நம்மளால முடிஞ்ச ஒரு பாட்டு கிறுக்கி வைப்போமேன்னு தோணிச்சி.

. ஒரு முன்குறிப்பு.

 தயவுசெய்து எனக்காக ஒரு முறை ஒரிஜினல் பாடலைக்கேட்டுவிட்டு, இதைப்பாடிப்பார்க்கவும்.

கோலிவுட்டை ஆளப்போகும் கண்ணே..கருநிற மண்ணே
சில புத்திமதிகள் சொல்லுறன் கேளு அண்ணே..

கேப்டன் வீட்டுப்பிள்ளையாக இருந்தாலும்...தம்பி
சரியா நடிக்கக்கூடாது எந்நாளும்..
கோலிவுட்டை ஆளபோகும் BUNனே..அரைப்படி மண்ணே
சில புத்திமதிகள் சொல்லுறன் கேளு முன்னே

டைரக்டரையும், புரடியூசரையும் மிதிக்கனும் உன்
நடிப்பப்பாத்து ரசிகனுங்க கொதிக்கனும்...
ஃபைட்டு சீனில் காலை சுவத்தில் உதைக்கனும்
நாக்கை துருத்தி முழியை உருட்டிமிரட்டி
எதிரி கதைய முடிக்கனும்..
கோலிவுட்டை ஆள வந்த அண்ணே, மண்ணெண்ணை டின்னே
சில புத்திசதிகள் சொல்லுறன் கேளு தின்னே

நல்லகதைகள் சொல்லும் பயல்களிடம் போகாதே-அது
படம் பார்க்கும் ரசிகனுக்கு ஆகாதே-இந்த
நொண்ணேன் சொல்லும் ஐடியாவத்தள்ளாதே
நம்ம கேப்டன் பாட்டன் பேரை நீயும் போட்டுத்தள்ளாதே
கோடம்பாக்கம் குதிக்கபோகும் கன்னே..கேப்டன் சன்னே
சில புத்திமதிகள் சொல்லுறங்கேளு அண்ணே


புரடியூசர் சூட்கேசுல இருக்கனும் நம்ம கண்ணுதான்
நம்ம வச்சி படம் எடுத்தா அவர் கதையோ  அதோட மண்ணுதான்
படம் ஓடாட்டியும் போஸ்டர்கள்ல விண்ணுதான் ஆனா
பாவம் புரடியூசரோ சொந்த ஊருக்கு ரன்னுதான்
கோடம்பாக்கம் ஆள வந்த கண்ணே குவார்ட்டர் ஜின்னே
சில அட்வைஸுகள் சொல்லுறங்கேளு நின்னே

ஹீரோயின் கூட நீ இருந்து கிஸ்ஸுகிசுவுல மனம் மகிழ்ந்து
பார்ட்டிகளில் பங்கு எடுத்து எதிரிகளின் சங்கு உடைத்து
பதி  நெட்டுப்பட்டிகளின் பஞ்சாயத்து முடித்து
ஆ...... ஆ.......ஆ......
ஹிட்டுகள் தந்து அட்டுகள் தந்து
அட்டுகள் பாத்தவன் நட்டுகழண்டு
நட்டுகழண்டவன் கெட்டு உழன்று
பாயாவுல புரோட்டா தொட்டு
நூறு புரோட்டா திங்கப்போற தம்பி நீ
நமக்கு கேப்டன் துணையிருக்கார் நம்பு நீ
நம்ம புரோட்டாவ கேப்டன் தின்னுமுடிப்பார் நம்பு நீ...
கேப்டன் தின்னு முடிப்பார்  வெம்பு நீ..

பின் அரிப்பு:
இதைப்படிச்சிட்டு தம்பி சண்முகபாண்டியன் படத்துக்கு பாட்டெழுத
கூப்பிட்டுருவாங்களோன்னு பயமா இருக்கு.

மகான் கணக்கு-விமரிசனம்.கணக்கு,பிணக்கு,ஆமணக்கு

 பன்னி பல குட்டி போட்டமாதிரி இந்த வெள்ளியன்று மட்டும் மூனு டப்பிங் படங்களையும் சேர்த்து மொத்தம் பதின்மூன்று படங்கள் ரிலீஸாகியிருப்பதாக தகவல் சொன்னார்கள்.

எல்லாப்படங்களுக்குமே அழைப்பு இருந்தும்.வருஷக்கடைசியில் வருத்தமான வாழ்க்கை வேண்டாமே என்று அந்தப்படங்கள் போட்ட தியேட்டர்கள் இருக்கிற திசையைக்கூட நான் திரும்பிப்பார்க்கவில்லை.

நேற்று கொஞ்சம் ஃப்ரியாக இருந்ததால் ‘பதினெட்டான்குடி’ என்ற படத்தை இடைவேளை வரை பார்க்க நேர்ந்தது.

நேர்ந்தது என்று எழுதும்போதே என் கதை தீர்ந்தது என்பதையும் புரிந்து கொண்டிருப்பீர்கள்.படத்தில் மொத்தம் பதினெட்டு இடங்களில் குடிக்கிறார்கள். இனிமே எங்களைப்பார்க்க வருவியா என்று ரசிகர்கள் மண்டையில் ‘மடேர் மடேர்’ என்று அடிக்கிறார்கள் என்பதைத்தாண்டி இந்தப்படத்தைப் பற்றி எழுதி உங்கள்

பழி பாவத்துக்கு ஆளாக விரும்பவில்லை.

இன்று மாலை’ மகான் கணக்கு’ என்று சென்சாரால் பெயர் மாற்றம் செய்யப்பட்ட’காந்தி கணக்கு’ படம் பார்த்தேன்.இடைவேளைக்குப்பிறகு சுமார் பத்துக்கும் மேற்பட்ட இடங்களில் பத்திரிகையாளர்கள் கைதட்டிக்கொண்டே இருந்தார்கள். அதனால் இதை ஒரு நல்ல படம் என்று நான் சொல்ல வரவில்லை.

ஆனால் இந்தப் படம் பேசப்படவேண்டிய படம் என்பதில் எந்த சந்தேகத்துக்கும் இடம் இல்லை.

படத்துக்காக டைரக்டர் தொட்டிருக்கும் மேட்டர் அப்படிப்பட்டது.

‘’ மாப்ள மயித்தைக்கட்டி மலையை இழுப்போம். வந்தா மலை.போனா மசுரு’ மதுரைப்பக்கம் ரொம்ப பேமஸான இந்த டயலாக்கைத்தான் டைரக்டர் செயல்படுத்தியிருக்கிறார்.

அவர் வம்பிழுத்திருக்கும் மலை ஐ.சி ஐ.சி வங்கி.

கதை இதுதான். ஹீரோ ரமணாவின் மாமா  அவரை  நன்றாக படிக்க வைப்பதற்காக ஓசிஓசி வங்கியில்

லோன் வாங்குகிறார்.லோனை அவர் ஒழுங்காக கட்டிய பிறகும், பல பித்தலாட்ட வேலைகள் செய்து, லேட் பேமெண்ட், வட்டி, அதுபோடும் குட்டி போன்றவைகளை கட்டச்சொல்லி,  அடியாட்களை வைத்து அவரை டார்ச்சர் செய்கிறது ஓசி ஓசி வங்கி.

இதனால் ரமணாவின் மாமா, அக்கா ஆகியோர் தங்கள் குழந்தையுடன் தற்கொலை செய்து கொள்கிறார்கள்.இடைவேளை.

இதன்பின் குறுக்கு வழியில் கோடிக்கணக்கில் கடன் வாங்கி ஓசிஓசி வங்கியை ஏமாற்றி கடன் வாங்கி அவர்களின் பித்தலாட்டங்களை கோர்ட்டில் அம்பலப்படுத்துகிறார் ரமணா.

கதை என்ற வார்த்தையைக்கூட பயன்படுத்த முடியாது. டைரக்டர் சம்பத் ஆறுமுகம் எடுத்துக் கொண்டிருக்கும் ‘மேட்டர்’ உண்மையிலேயே சூப்பர்தான்.

அடியாட்களைக் கொண்டு தனியார் வங்கிகள் நடத்தும் அடாவடித்தனத்தை செருப்பால் அடித்திருக்கிறார் என்று சொன்னால் மிகையில்லை. இதை ஒரு சுவாரசியமான கதையாக மாற்றுவதில் அவருக்கு சாமர்த்தியம் போதவில்லை .

‘’இந்தியா கூட தான் உலக வங்கியில கடன் வாங்கியிருக்கு. அதுக்காக தினமும் நாலு ரவுடிகளை

பார்லிமெண்டுக்கு அனுப்புனா எப்பிடி நிம்மதியா ஆட்சி நடத்த முடியும்? என்ற வசனம் ஒரு சில்வர் ஜூப்ளி தரக்கூடிய உதவி இயக்குனர் யாரோ சம்பத்திடம் இருக்கிறார் என்று சொல்கிறது.

மற்றபடி மேக்கிங்கில் மிகச்சாதாரணமான படம்தான்.

 ராஜபாட்டையில் பல கெட் அப் போட்டதால், தன் ஒரே சொந்த கெட் அப்பையும் மறைத்துக்கொண்டு விக்ரமே தலைமறைவாக அலைவது தெரியாமல், ரமணவும் ஒரு பாடலில் பல கெட் அப்புகளில் காட்சி அளிக்கிறார்.தாங்க முடியலைடா சாமியோவ்.

 கதாநாயகியை எங்கே கண்டெடுத்தார்கள்: என்பது தெரியவில்லை.பிரம்மா தயாரிப்பு பணியில் ஈடுபட்டுக் கொண்டிருக்கும்போது பாதியில் பூலோகம் கொண்டுவந்துவிட்டதைப்போல ஏகப்பட்ட manufacturing defuct' டுடன் இருக்கிரார். சும்மா தொட்டுக்க’ மட்டும் அவ்ரைப்பயன்படுத்தியிருக்கிறார்கள்

வெள்ளைக்காரர்கள் முன்பு வியாபாரம் செய்யவந்து நம்மை அடிமைப்படுத்தியதுபோல், இப்போது அந்நிய நாட்டு வங்கிகள் நம்மை நாஸ்தி பண்ண வந்திருக்கின்றன என்ற மலை போன்ற கருத்தை .............கட்டி இழுத்ததற்கு பதில் கொஞ்சம் நல்ல கயிரு கட்டியே இழுத்திருக்கலாம் இயக்குனர்.

ராஜபாட்டை விமரிசனம்.’ 70 எம்.எம். சைஸ் ஒட்டை

நமது தமிழ்சினிமா ஹீரோக்களை அவ்வப்போது ஏதாவது ஒரு வியாதி பிடித்து ஆட்டும்.

இப்போதைய லேட்டஸ்ட் வியாதி கெட் அப் சேஞ்ச்.
 அது ‘ராஜபாட்டை; யில் விக்ரமை
கொஞ்சம் ஓவராகவே பிடித்து ஆட்டியிருக்கிறது.

சில நூறு கோடிகளோடு, தமிழ் சினிமாவுக்குள் நுழைந்திருக்கிறார் என்று கிசுகிசுக்கப்படும்
பொட்லூரி.வி.பிரசாத் தயாரிப்பில் வந்திருக்கும் முதல் படம்.
பட விமரிசனம் எழுதும்போது
இந்த தகவல்கள் எல்லாம் எதுக்கு என்ற கேள்வி வரலாம்.
 அதை கடைசியில் பார்ப்போம்.

சில நல்ல படைப்பாளிகள் கூட குறிப்பிட்ட காலத்துக்குப் பிறகு
 வயது மூப்பு, தன்னைப்புதுப்பித்துக்
கொள்ளாமை போன்ற சில காரணங்களால் தடுமாறி , ஒரு சில நல்ல படைப்புகளோடு ஓய்ந்து போய்விடுவதுண்டு.

‘வெண்ணிலா கபடிக்குழு’ மற்றும் ‘அழகர்சாமியின் குதிரை’ என்ற இரு தரமான படங்களைத்
தந்த இயக்குனர் சுசீந்திரனின் பெயரை திரைக்கதை இயக்கம் என்று போடுகிறார்கள்.
டைட்டில்
கார்டு எழுதும்போது தப்பு எதுவும்  நடந்துவிட்டதோ என்று சந்தேகிக்க வேண்டிய அளவுக்கு
மொத்த படமும் இருந்தால் என்ன செய்வதாம்?

விமரிசகனுக்கு விதிக்கப்பட்ட ஒரு சாபம்.படத்தில் அப்படி என்று ஒன்று இல்லாவிட்டாலும்
கூட ,கதை என்ற ஒன்றை எழுதவேண்டியிருப்பது.

நாயகன் விக்ரம் சினிமாவில் பெரிய வில்லன் ஆகத்துடிக்கும் ஒரு ஸ்டண்ட் பார்ட்டி.பெரியவர்
கே. விஸ்வநாத்துக்கு அவரது பிள்ளை மூலமே ஒரு பிரச்சினை வருகிறது.அனாதைக் குழந்தைகள்
 படித்து வரும் அவரது ஆசிரம நிலத்தை அப்பாவை மிரட்டி எழுதி வாங்க நினைக்கிறார். அந்த
நிலத்தை அரசியல் புள்ளி‘ அக்காவுக்கு ’எழுதி வைத்துவிட்டு எம்.எல்.ஏ ஆக வேண்டும் என்பது
விஸ்வநாத் பிள்ளையின் நோக்கம்.

 இந்த ஆபத்திலிருந்து  கே.விஸ்வநாத்தைக்காப்பாற்ற நினைத்து
 அவரைத்தன்னோடு தங்க வைத்துக்கொள்ளும் விக்ரம்.....
.
அடுத்து ஆயிரத்துக்கும் அதிகமான படங்களில் நீங்கள் பார்த்துச் சலித்த காட்சிகளோடு
கர்ணகொடூரமாய் நகர்கிறது ‘ராஜபாட்டை.’.

படத்தின் ஆரம்பத்தில் இடம்பெறும் சண்டைக்காட்சிகளில் எது ஒரிஜினல், எது சினிமா சண்டைக்
காட்சி என்று புரிந்து கொள்வதற்குள் நம் மண்டை தீப்புடிக்கிறது.

காமெடியாய் ஃபைட் பண்ணுகிறேன் என்ற எண்ணத்தில்  விக்ரம்  அடிக்கும் லூட்டிகள்  ஜித்தன்ரமேஷ்
ரேஞ்சில் பார்க்க பரிதாபமாய் இருக்கிறது.

 58 வயசிலும் காலேஜ் பையனாட்டம், 5வது சீனில் லவ்
பண்ண ஆரம்பித்து 7 வது சீனில் டுயட் பாடி  ரசிகர்களை  வன்கொடுமை செய்வது நியாயமா சியான்?

[இந்தப்படம் டெல்லியில ரிலீஸாகாம பாத்துக்கங்க..இதுல உங்க நடிப்பைப்பாத்தா கண்டிப்பா தேசிய
விருதைத் திரும்ப கேப்பாங்க]

எதோ தேச்சா பாத்திரம் மாதிரி காட்சி அளிக்கும் தீச்சா சேத் தான் ஹீரோயின். நம்மளை விட ஒரு
 முப்பத்தஞ்சு வயசு மூத்தவரை லவ் பண்ண விட்டுட்டாங்களேங்கிற  பரிதாபப் பார்வையைத் தவிர நடிக்கிற
முயற்சி எதுலயும் ஈடுபட்ட மாதிரி எந்த அறிகுறியும் தெரியலை.

‘சலங்கை ஒலி’ சங்கராபரணம்’ போன்ற காவியங்களைத் தந்த கே.விஸ்வநாத் முதல் பாதியில்  விக்ரமுக்கு ஹீரோயினை
லவ் பண்ண ஐடியா தருவதெல்லாம் மட்டமான சீன்கள். இதுக்குப்பதில்
கே. விஸ்வநாத்தே கூட தீச்சாவை லவ் பண்ணியிருக்கலாம்.

கொஞ்சம் போனால் முதலமைச்சராகவே ஆகப்போகும் அக்கா [ பாக்க பக்கா ]  விக்ரமை அடிக்க தொடர்ந்து
அடியாட்களை அனுப்புவதும், எல்லா தினுஷான ஆயுதங்களோடும் வரும் கும்பல் விக்ரமிடம் மட்டும்
வெறுங்கையாலேயே அடிபட்டுச்சாவதும்.. ஆண்டவா இன்னும் எத்தனை படங்கள்லதான் பாக்குறது?

.இசை யுவன் ஷங்கர் ராஜா. கதையே இல்லாத படத்துக்கு நல்ல இசை மட்டும் என்னத்துக்கு என்று
நினைத்திருப்பார்போல. ஒளிப்பதிவு மதி. மற்றும் நன்றி கார்டில் 4பேர்.

 கதைப்படி, படம் முடியும்போது, வில்லனாக விரும்பும்  விக்ரம் ஹீரோவாக மாறி 2 கோடி சம்பளம் வாங்கும்
நிலைக்கு உயர்ந்து ரீமாசென்னோடும், ஷ்ரேயாவோடும் டூயட் பாட ஆரம்பிக்கிறார்.
 உண்மையில் விக்ரம் இந்தப் படத்துக்கு
எட்டுகோடி சம்பளம்  வாங்கினாராம். அது இனிமேல் இரண்டு கோடியாக மாற விக்ரமுக்கு இந்த ஒரு படமே
போதும்.

சுசிந்திரனைப் பற்றி என்ன எழுதுவதென்றே புரியவில்லை.
 மொத்தத்தில் ‘ராஜபாட்டை’ ஹீரோவும், டைரக்டரும்
தங்களுக்கும் தங்களை நம்பி படமெடுக்க வந்த தயாரிப்பாளருக்கும் சேர்த்து கட்டிய ராஜ’பாடை’ என்றுதான்
சொல்லவேண்டும்.

மவுன குரு் விமரிசனம்..பேச வைக்கிறார் இயக்குனர்

அம்மா ஹீரோவுக்கு சாப்பாடு வைக்கிற முதல் காட்சி’’இதே குழம்பத்தான் மூனு நாளா வேறவேற  பாத்திரத்துல வச்சி ஊத்துற போல தெரியுது’’என்ற வசனத்தின்போதே, நாம் வந்திருப்பது வழக்கமான தமிழ் சினிமா இல்லை என்ற உணர்வை ஏற்படுத்திவிடுகிறார் அறிமுக இயக்குனர் சாந்தகுமார்.

 அப்பா மு.க.தமிழரசு தயாரிக்க ,மகன் அருள்நிதி நடிக்க,  டைரக்டர் ரெண்டு பஞ்ச் டயலாக் அடிக்க ..ரசிகர்கள் கிடந்து துடிக்க ஒரு படம்  என்ற நினைப்பில் தான் தியேட்டருக்குப்போனேன்.

மூத்தவன் போல் விவரமா இல்லையே என்று சதா அம்மாவால் சலித்துக்

கொள்ளப்படும் சாதாராண மாணவன் கருணாமூர்த்தி. ஒரு அடிதடி பிரச்சினைக்காக, கல்லூரியிலிருந்து டிஸ்மிஸ் செய்யப்பட்டு,  சென்னையில் அண்ணனின் சிபாரிசால் வேறொரு கல்லூரியில் சேருகிறான். அண்ணியின் தங்கை இனியா தங்களுடன் இருப்பதால், கருணாமூர்த்தியை ஹாஸ்டலில் சேர்க்கிறார்கள்.

இப்படி ஒரு ட்ராக்கில் கதை பயணித்துக்கொண்டிருக்குபோதே,.

..

நாலு போலீஸ்காரர்கள் ஆக்ஸிடெண்ட் ஆன ஒரு காரிலிருந்து கோடிக்கணக்கில்  பணத்தை கொள்ளையடிக்கிறார்கள். இறந்து விட்டதாக நினைத்த டிரைவர் உயிரோடு எழுந்து வர, அவனைப்போட்டுத் தள்ளுகிறார்கள். இந்த ரகஸியம் ஒரு போலீஸ்காரரின் கள்ளக்காதலிக்கு தெரிய வரவே, அவளையும் தற்கொலை செய்கிறார்கள்.சாகும்போது தன்னிடமிருந்த வீடியோ ஆதாரத்தை, மாணவன் ஒருவன் திருடிக்கொண்ட தகவலை அந்த கள்ளக்காதலி சொல்லிவிட்டுச்சாக மாணவனைத்தேடிப்போகும் இடத்தில்,சம்பந்தப்பட்ட மாணவனுக்குப்பதில்  தவறுதலாக ஹீரோ,மாட்டிக்கொள்ள,...இங்கே கதை டாப் கியரில் சூடு பிடிக்கிறது.

இனியாவின் முதல் சமையலை கிண்டல் பண்ணும்போது,’’எதையுமே எடுத்தவுடனேவா சரியா செய்ய முடியும்? சைக்கிள் ஓட்டப்பழகுறப்ப,ரெண்டு மூனுதடவை கீழ விழுந்துதான கத்துக்கிறோம்’?

என்ற வசனத்தை அருள்நிதிக்காகவே எழுதியிருப்பார்கள் போலும்.

.

நடிப்பில் முந்தைய படங்களோடு ஒப்பிடும்போது கொஞ்சம்‘ விழுந்து எழுந்திரிக்க’ ஆரம்பித்திருக்கிறார்.

கதாநாயகனுக்கு அணுசரனையாக தோள்கொடுப்பது, காபி போட்டுக்கொடுப்பது, டிபன் செலவுக்கு காசு கொடுப்பது என்று சின்ன ரோலாக  இருந்தாலும் மனம்கொத்தும் இனியா தமிழ்சினிமாவுக்கு ஒரு இனிய வரவு.

டூயட் எதுவும் வைக்காமல் மிக நாகரீமாக இவர்கள் காதலைச்சொன்னவிதத்தில் நம்பிக்கை அளிக்கிறார் இயக்குனர்.

கறார் மற்றும் கர்ப்பிணி இன்ஸ்பெக்டராக வரும் உமா ரியாஸ்கான், மேற்படி கேஸை தனி ஆளாக துப்புத்துலக்குவது ஒரு புறம் இருக்கட்டும்.

க்ளைமேக்ஸில் யாரோ ஒரு பெரிய ஆபிசர் சொன்னார் என்பதற்காக, கொல்லத்துடிக்கும் வில்லன்களிடம் ஹீரோவை அம்போ என்று விட்டுவிட்டு’’நீ போய் பைத்தியக்கார ஹாஸ்பிடல்ல அட்மிட் ஆயிக்கோ’என்று சொல்வது கதையில் ஒரு சிறு சறுக்கல்.

ஒருவேளை அப்படி விட்டுவிட்டுப்போனால்தான், ஹீரோ வில்லன்களைப் பழி வாங்கமுடியும் என்று இயக்குனர்  நினைத்திருப்பாரோ என்னவோ.?

மற்றபடி, தெளிவான ஒளிப்பதிவு,விறுவிறுப்பான திரைக்கதையுடன் வெளிவந்திருக்கும் மவுன குரு’.படத்தின் இயக்குனரைப்பற்றி பேச வைக்கிறது.