என்ன அழ வைத்த ‘தல’ அஜீத்

முன் குறிப்பு: இந்த இடுகை கொஞ்சம் நீளம் அதிகமாயிடுச்சி. அதனால நீங்களே ஏதாவது ஒரு இடத்துல இண்டர்வெல் விட்டுட்டு,மீதியை அப்புறமா வந்து படிச்சிக்கங்க.

’சேது’ ஹிட்டாகி மொத்த இண்டஸ்ட்ரியுமே பாலாவை வைத்து படம் தயாரிக்க ஆளாய்ப் பறந்தபோது, அவர் ஒரு வித்தியாசமான தயாரிப்பாளரைத் தேர்ந்தெடுத்தார்.அவர் பெயர் பூர்ணசந்திரராவ். இவர்தான் நமது அடுத்த புரடியூசர் என்று பாலா முடிவு செய்த காரணத்தை வேறொரு சந்தர்ப்பத்தில் எழுதுகிறேன்.  இது தல ஏரியா .மத்த மேட்டருங்க தலயிடக்கூடாத ஏரியா.

அப்போது இருந்த நிலவரப்படி பாலா-பூர்ணசந்திரராவ் கூட்டணியில்  ‘நந்தா’ படத்துக்கு ஹீரோ என்று முதலில் முடிவு பண்ணப்பட்டவர் அஜீத்தான்.

ஜெயா ஃபிலிம் சிடி காட்டேஜில் ஏகப்பட்ட பாம்புகள், மனிதர்களை விட தைரியமாக நடமாடிக்கொண்டிருந்த பகுதியில், டிஸ்கசனுக்கு தயாரிப்பாளர் தரப்பில் ரூம் போட்டிருந்தார்கள்.

‘பாளையங்கோட்டை சிறையினிலே பாம்புகள் பாலாக்கள் நடுவினிலே நான் அமர்ந்திருக்க,’நந்தா’ கதையைக் கேட்க அஜீத் வந்தார்.

இவ்வளவு பெரிய ஹிட் குடுத்திருக்கோம். அதுக்கப்புறமும் கதை சொல்லனுமா? என்ற கேள்வி ஒருபுறமும், வச்சிக்கிட்டா வஞ்சனை பண்றாங்க’ என்கிற நிதர்சனம் ஒரு புறமுமாக அன்று அஜீத்துக்கு, சும்மா ஒரு பத்து வரிகளில்தான்  பாலா கதையே சொன்னார்.

இந்த பத்து வரியைக்கேக்கத்தானா இவ்வளவு தூரம் வந்தேன் என்பது போல் அஜீத் பார்க்க, ’’வெயிட் பண்ணுங்க .ஒரு அஞ்சி நிமிஷத்துல, அடுத்து முழுக்கதையை எப்ப சொல்றேன்னு முத்துகிட்ட சொல்லி அனுப்புறேன்’ என்றார் பாலா.

(அவர் தல, நான் தறுதல)

அஜீத் ரூமுக்கு வெளியே காத்திருக்க,’’முழுக்கதையும் சொல்ல இன்னொரு பத்து நாளாவது ஆகும்னு சொல்லி அனுப்பிச்சிட்டு வாங்க’ என்று என்னை அனுப்பி வைத்தார் பாலா.

’எங்கே செல்லும் நந்தா’ கதை என்ற ரீ-ரெகார்டிங் மட்டும் பின்னணியில் ஒலிக்க, அடுத்த பத்து நாட்களும் டிஸ்கசன் என்ற பெயரில் ஒரு எழவும் நடக்கவில்லை.

ஆனால் கம்பெனியிலிருந்து கரெக்டாக நாள் குறித்து மறுபடியும் அஜீத்தை அனுப்பி வைத்துவிட்டார்கள். என்னிடம் சொல்லவில்லையென்றாலும்,நந்தா’ வுக்கு அஜீத் தோதுப்பட மாட்டார் என்று பாலா முடிவு செய்து வைத்திருப்பதை நான் முன்பே யூகித்துவிட்டேன்.

தயாரிப்பாளர் தரப்பைப்பொறுத்தவரை  அந்த முடிவை தான் எடுத்ததாகக்காட்டிக் கொள்ளாமல், அஜீத்தே எடுத்ததாக இருக்கட்டும் என்ற எண்ணத்தில் பாலா  வீரியமாக ஒரு காரியம் செய்தார்.

அஜீத் ஒரு நீண்ட கதை கேட்கபோகும் ஆவலில், காட்டேஜ் அறைக்குள் அமர, மேலும் பத்து நாட்கள் ’பட்டை’ தீட்டப்பட்ட ‘நந்தா’ கதையை பாலா சொல்ல ஆரம்பித்தார்.அது முதலில் சொன்ன பத்து வரியில் எட்டு வரி காணாமல் போய் வெறும் ரெண்டே வரியில் முடிந்து விட்டது.

பாலாவின் உள்குத்து’ புரியாமல் அஜீத் கொஞ்ச நேரம் முழித்தார். பிறகு சுதாரித்து, தர்மசங்கடமான ரியாக்‌ஷன் எதுவும் கொடுக்காமல் கிளம்பிப்போனார்.

அஜீத் இல்லை என்று ஆகிப்போன சில தினங்களிலேயே, தயாரிப்பாளர் பூர்ணசந்திரராவும் இல்லாமல் போய், அமெரிக்காவில் இருந்து   தயாரிப்பாளர்களாக நான்கு புன்னகை மன்னன்கள் வந்தனர். அடுத்த நந்தாவாக பாரதிராஜாவின் பிள்ளை  மனோஜ் முடிவு பண்ணப்பட்டு,அது கடைசியில் சூர்யாவாக மாறிய பெருங்கதை எல்லாம் பிறகு. இது ‘தல’ ஏரியா. மத்த மேட்டருங்க தலயிடக்கூடாத ஏரியா.

சினிமாவுல மட்டும்தான் ஃப்ளாஷ்பேக் போடுவாங்களா?  இப்ப நான் போடுறதுக்குப் பேரு ப்ளாக்பேக்’.

அப்பிடியே ஒரு ரெண்டு வருஷம் பின்னாடி வாங்க.

‘அதர்மம்’ரிலீஸாகி வெற்றிப்படம்னு ஆன உடனே, ரமேஷ்கிருஷ்ணன் தன்னோட பாண்டி பஜார் ரூமை எனக்குத்தாரை வார்த்துட்டு, முழுநீள உதவி இயக்குனரா வச்சிக்கிட்டான்.

படம் ஹிட்டே ஒழிய ரமேஷுக்கு அடுத்த படம் அவ்வளவு சீக்கிரமே வரலை. பாக்குறதுக்கு ஸ்டண்ட் யூனியன் ஆளு மாதிரியே இருப்பான். இந்தி ஆர்டிஸ்ட் மாதிரியே ட்ரெஸ் பண்ணியிருப்பான். பேச்சுல ஒரு தெனாவெட்டு. சதா ரே-பான் கூலிங் கிளாஸ். பென்சன் -ஹெட்ஜஸ் சிகரட். மொத்தத்துல ஒரு மார்க்கமான மதுரைக்காரன்.

’அதர்மம்’ ரிலீஸாகி பதினைஞ்சி மாசமாச்சி. காலையில ஒரு டிஸ்கசன்ல இருப்போம். அது மத்தியான லஞ்ச்சோட கேன்சல் ஆயிருக்கும். மறுநாள் வேற ஹீரோ வேற புரடியூசருக்கு டிஸ்கசனுக்கு உட்கார்ந்திருப்போம். அது காலை டிபனோடவே கதை முடிஞ்சிருக்கும்.  

(பகைவன் கிளாப் போர்டுடன் நான்)

எல்லாத்துக்கும் ஒரு முடிவு வந்தாகனுமே, ரமேஷ் தன்னோட நிலை உணர்ந்து சகஜ நிலைக்கு வந்த ஒரே நாள்ல அவனுக்கு ரெண்டு படங்கள் கமிட்’ஆனது. ஒண்ணு விஜயசாந்தி-ராம்கி நடிச்ச ‘தடயம்’ ரெண்டாவது சத்யராஜ் சாரும், நம்ம தல அஜீத்தும் நடிச்ச ‘பகைவன்’.

‘பகைவன்’ படத்தயாரிப்பாளர் விஸ்வாஸ் சுந்தர் சார் ஆபிஸ்ல தான் அஜீத்தை முதமுதல்ல மீட் பண்றேன். அப்ப ‘காதல் கோட்டை’ படத்துல நடிச்சி முடிச்சிருந்தார்,ஆனா ரிலீஸாகலைன்னு நினைக்கிறேன்.

‘நேசம்’ உல்லாசம்’ன்னு அவர் மார்க்கட் ’பல மாசமா ரொம்ப  மோசமா’தான் இருந்தது. ரமேஷ் ஒரு சுமாரான கதை சொல்ல, 4லட்ச ரூபாய் சம்பளம் பேசி ஒரு இருபத்தையாயிரத்துக்கு செக் வாங்கிட்டு கிளம்பிப்போனார் அஜீத். படத்தோட ஹீரோயின் அஞ்சலா ஜவேரி,கோவேறிக் குதிரை மாதிரி இருக்குன்னு சொல்லி புரடியூசர் எங்க தலையில கட்டிவிட்டார்.

இந்த ‘பகைவன்’ கதையும் இன்னொரு சந்தர்ப்பத்துலதான் சொல்லனும்.

நான் வேலை பாத்த ரெண்டு படங்களுமே,ஊத்தி மூடிக்கிட்டதுனால, கழுதை கெட்டா குட்டிச்சுவரு மாதிரி’ குமுதத்துல’ சினிமா நிருபரா வேலைக்குச்சேர்ந்தேன்.அங்க நடந்ததை அப்புறமா தான் எழுதுவேன்னு குமுதம் அண்ணன்களுக்கு சத்தியம் பண்ணிக்குடுத்த மாதிரியே,ஆபீஸுக்குள்ள கூட நுழையாம நேரா அவுட்டோருக்கே போறேன்.

இடம்: ஹைதராபாத் ‘ரெட்’ பட ஷூட்டிங். அஜீத் சாரை ஒரு பேட்டி எடுக்கலாமுன்னு போயி, பழைய கதையெல்லாம் பேச ஆரம்பிச்சி ரொம்ப நெருக்கமாயிட்டோம். அன்னிக்கே கிளம்பலாமுன்னு முடிவு பண்ணினப்ப அஜீத் சார் என்னப்போக விடலை.

அஜீத்துக்கு ‘குமுதம்’ ஆபீஸ் பத்தி சில விஷயங்கள் சொல்லி புரிய வச்சப்ப, ‘’நீங்க ஒரு மூனு நாள் தங்குறதுக்கு ஆபீஸ்ல என்ன காரணம் சொன்னாதான் அனுமதிப்பாங்கன்னு கேட்டார். நான் உடனே ஒரு சின்ன தொடர் எழுதுறதா ஒத்துக்கிட்டீங்கன்னா, அதை எழுதிக்குடுத்துட்டு வேலையை விட்டுட்டு ஓடிப்போனா கூட கவலைப்பட மாட்டாங்க. அவிங்க அவ்வளவு நல்லவிங்க ‘’ என்றேன்.
 
பாலாவின் அந்த ‘நந்தா’ மேட்டர் உட்பட யாரைப்பத்தியும் காண்ட்ரவர்ஸி பண்ணாம எழுதுறதா இருந்தா பண்ணலாம் என்றவர், நான் கூடத்தங்கியிருந்த மூன்று நாட்களுமே ‘முத்துஜி’என்று தாங்கு தாங்கென்று தாங்கினார்.
சாப்பிடும்போது குறைவாகச்சாப்பிட்டால் சொந்த சகோதரர் போலவே சண்டை போடுவார்.
அப்போது தான் அவருக்கு புதிதாக போட்டோகிராபியின் மீது ஆசை வந்திருந்தது. எனக்கு கேமரா மீது இருந்த தீராத ஆர்வத்தைப் பற்றியும்  கேட்டுக்கொண்டார்.

கடைசி நாளில் அவரிடம் சொல்லிவிட்டு ரயில்வே ஷ்டேசன் கிளம்பிய போது பின்னாலேயே துரத்தி வந்த காரில் ‘கன்வேயன்ஸ்’ என்ற பெயரில் ஒரு பெரிய கவர்’ வந்தது. அதைக்கொண்டு வந்த மேனேஜரிடம் வலுக்கட்டாயமாகத் திருப்பிக்கொடுத்துவிட்டு வந்த போது, மறுநாள் போனில் என்னை அழைத்து ரொம்பவும் வருத்தப்பட்டார்.

அடுத்து அவர் சென்னை வந்தவுடன் அவரது அலுவலகத்தில் சந்தித்து பேசிக்கொண்டிருந்த போது, ‘நீங்கள் எனக்கு எதாவது பரிசளிப்பதாக இருந்தால், குமுதத்திலிருந்து வேலையை ராஜினாமா செய்த பிறகு அளியுங்கள் என்று மட்டும் அவரை சமாதானப்படுத்திவிட்டு வந்தேன்.

இது நடந்து பல மாதங்கள்  இருக்கும். ஒரு நாள் ‘குமுதம்’ வேலையை ராஜினாமா செய்துவிட்டு,எல்லோருக்கும், தகவல் தெரிவிப்பது போல்  அஜீத்துக்கும் தெரிவித்து விடுவோமே என்று நினைத்து படப்பிடிப்பு எங்கே நடக்கிறது என்று விசாரித்தால், அது எனது வீட்டுக்கும் குமுதம் ஆபிசுக்கும் நடுவில் உள்ள குஷால்தாஸ் கார்டனாக அமைந்தது.

கேரவனுக்குள் இருந்த அஜீத் உள்ளே வரச்சொன்னார். வேலையை ஏன் விட்டீர்கள்? என்று பதறினார். பதற வேண்டியதில்லை. சினிமாவில்தான்  நான் செல்லுபடியாகவில்லையே ஒழிய ,பத்திரிகைகளில் எப்போதுமே என்னை வேலைக்குச் சேர்த்துக்கொள்வார்கள், அதனால் பதறத்தேவையில்லை. விரைவில் ஒரு நல்ல செய்தியுடன் வருகிறேன் என்று சொல்லி கிளம்பினேன்.

அங்கிருந்து கிளம்பி நான் வீட்டுக்குப் போய்க்கொண்டிருக்கும் வேளையில் அஜீத் ஒரு சாகஸம் நிகழ்த்திக்கொண்டிருக்கிறார் எனபதை அறியாத என் பயணம் அது.

 நான் காலிங் பெல் அடித்து வீட்டுக்குள் நுழையும்போது என் குட்டிப்பையன் நந்து தூக்க முடியாமல் தூக்கிக்கொண்டு ஒரு புத்தம் புதிய கேமரா பேக்குடன் நிற்கிறான்.

திறந்து பார்த்தால் ஒரு நிகான் எஃப்.எம் 2 கேமரா, உடன் ஒரு 70 டு 210 ஜூம் லென்ஸ். குமுதத்தில் இல்லாத முத்துராமலிங்கத்துக்கு அன்புடன் அஜீத்’ என்ற அந்தக்குறிப்பு, சற்று நேரத்திலேயே என் கண்ணீரால் நனைந்தது.

விமர்சனம் ’கழுகு’- இந்த டைரக்டர்கிட்ட பாத்து பழகு

நேற்று ஃபோர் ப்ரேம்ஸ் தியேட்டரில் இந்தப்படத்தைப்போட்டார்கள்.மவுனம் ரவிதான் படத்தின் பி.ஆர்.ஓ. அவர் பெயருக்கு ஏற்றாற்போல் மவுனமாக இருக்க, தலைவர் விஜயமுரளிதான் படம் துவங்குவதற்கு முன்பு, இயக்குனருக்கு, ஹீரோவுக்கு, தயாரிப்பாளருக்கு சால்வை அணிவித்தார்.

இப்படி முதல் பட டைரக்டருக்கு மாலை மரியாதை செய்வது இனி தொடர்ந்து நடக்கும் என்ற அதிர்ச்சி தகவலையும் பத்திரிகையாளர் முன்னிலையில் முதிர்ச்சியின்றி அறிவித்தார்.
படம் பாத்த பிறகு அது நல்லா இருந்தா, மாலைமரியாதை மட்டுமில்லாம, கற்பூரம் கொளுத்தி கூட ஆரத்தி எடுக்கலாம்.நூத்துக்கு தொண்ணுத்தி எட்டு அறிமுக டைரக்டருங்க, மொக்கையா படம் எடுத்து, புரடியூசர்களுக்கும்,தமிழ்சினிமாவுக்கும் மாலையை சாத்திட்டுப் போறப்ப, அவங்களுக்கு ஏன் நாம மாலை போடனும்ங்கிற கேள்வியை, துணிவாகவும் அதே சமயம் கொஞ்சம்   பணிவாகவும் கேட்டுக்கொண்டு, பிரஸ் ஷோவுக்கு இன்றைய டிபனாகக்கொடுத்த வடையுடன் விடை பெறுகிறேன்.

இப்ப நாம ‘கழுகு’ விமர்சனத்துல குதிக்கலாம்.

பத்திரிகை செய்திகளில் இந்தப்படத்தின் ஒன்லைன் பற்றிப் படித்த போதே, என் குலதெய்வம் அக்கம்மா அழகம்மா மீது சத்தியமாக, படத்தின் மொத்தக்கதை என்னவாக இருக்கும் என்று ஒரு நிமிடத்தில் யூகித்துவிட்டேன்.

பொதுவாக சினிமா ஏரியாக்களில் கதை எழுதுகிறவர்களை விட கதை ‘செய்கிறவர்களே’ அதிகம்.

கதை செய்வது எப்போதுமே மிக சாதாரணமான வேலை. ஆனால் அதற்கு பலபேர், ஒரு பிரபல பத்திரிகையின் இணையாசிரியர் டாய்லெட்டில் முரசொலியை வைத்துக்கொண்டு முக்குவதைப்போல்,  முக்குவதைப்ப்பார்த்திருக்கிறே

ன்.

தறுதலையாகத்திரிந்த ஒருவன் தொபேல் என  தபால் தலையில் இடம் பிடிக்கிறான்’

ஒரு பண்ணையார் வீடு, முன் வீட்டுல கல்யாணம், கொல்லைப்புறத்துல கருமாதி .என்ன நடந்துச்சி?
பொணங்கள சந்தோஷமா அடக்கம் பண்ணிக்கிட்டிருந்த வெட்டியான், முதமுதல்ல தன் குழந்தை செத்தப்ப அழுதான்.

தற்கொலைப்பாறையிலருந்து குதிச்சி சாவுறவங்க பாடிகளை மீட்டுத்தர்ற ஒருத்தன், அதே பாறையிலருந்து குதிச்சி தற்கொலை பண்ணிக்கிறான்.

 இதில் கடைசியாக நான் எழுதிய ஒன்லைன் தான் ‘கழுகு’ படத்தின் கதை.

ஒரு பத்து நிமிடம் விட்டத்தை வெறித்துப் பார்த்தபடி நீங்கள் யோசித்தாலும் உதித்து விடுகிற ஒரு சாதாரண கதைதான்.

கதாநாயகன் கிருஷ்ணாவும் அவனது நண்பர்கள் கருணாஸ், தம்பி ராமையா, மற்றும் பேச முடியாத அதனால் நமக்குப் பெயர் தெரியாமல் போனவருமாகச் சேர்ந்து, கொடைக்கானல் தற்கொலைப்பாறையிலிருந்து குதிப்பவர்களின்  பாடிகளைத் தேடி எடுத்து வரும் காசில், பீடி’குடித்து ‘ வாழ்கிறார்கள்.

இந்த வரிசையில் கதாநாயகி பிந்து மாதவியின் தங்கை தன் காதலனுடன் குதித்து விட , அவரது பாடியை மீட்டுத்தரும் கிருஷ்ணாவிடம் தனது உயிரோடு உள்ள பாடியை காதல் என்ற பெயரில் ஒப்படைக்கிறார்  பிந்து.

ஆரம்பத்தில் காதலை ஏற்க மறுத்து,’’இங்க பாரு பொண்ணு பாக்க லட்டு மாதிரி இருக்க உன்னை எவனாவது லவ் பண்ணி ஏமாத்திட்டுப்போயிடுவான். அதுல அப்செட் ஆகி நீ பாறையிலருந்து குதிச்சயின்னா, உன் பாடிய ஃப்ரியா தூக்கிட்டு வந்து உங்க அப்பா அம்மா கிட்ட ஒப்படைக்கிறேன்’’
என்று டயலாக்கெல்லாம் விடும் கிருஷ்ணா, ‘ அட ராமா ‘என்ற படி ஒரு கட்டத்தில் பிந்துவுக்கு நெருக்கமான ஜந்து ஆகிவிடுகிறார்.

தாடியைச்சொறிவது, வேஷ்டியைத்தொடை தெரியக் கட்டுவது ஆகிய இரண்டு வேலைகளை மட்டுமே படத்தில் செய்து வந்த வில்லன் ஜெயப்பிரகாஷின் கோரிக்கை ஒன்றை கிருஷ்ணா நிராகரித்து விட, கதைப்படி எப்படியும் கிருஷ்ணா க்ளைமேக்ஸில் பாறையிலிருந்துதான் குதிப்பார் என்று புரிந்துகொள்ளாமல், தனது அடியாட்களை வைத்து கிருஷ்ணாவையும் அவனது நண்பர்களையும் கொல்ல உத்தரவிடுகிறார்.

நண்பர்கள் மூவரும் கொல்லப்பட்டுவிட, கிருஷ்ணா மட்டும் பாறையிலிருந்து தனது பாடியுடன், தனது காதலி பாடியையும் கட்டிக்கொண்டு குதிக்கிறார்.கிருஷ்ணா ஏன் குதித்தார் என்று தெரிந்துகொள்ளும் ஆர்வம் இருந்தால், நீங்களும் ஏதாவது ஒரு தியேட்டரில் குதியுங்கள்.

சத்யசிவா என்ற புதிய இயக்குனர் இப்படி ஒரு தற்கொலைக்கதையுடன், கோடம்பாக்கத்தில் குதித்திருக்கிறார்.

கதை நடக்கிற களமும், இந்த பாத்திரங்களும் புதுசே ஒழிய, அவர்களுக்கு நடக்கிற எதுவும் நம்மை எதுவும் செய்யவில்லை.

ஹீரோ கிருஷ்ணாவும், அவரது நண்பர்களும், பாடியைத்தூக்குவதை சாக்காக சொல்லி படம் முழுக்க பீடி குடிக்கிறார்கள்.இதை ஒட்டி போடப்படும்’ புகை குடிப்பது புற்று நோயை உண்டாக்கும்’ என்ற குறிப்பு படத்தில் மொத்தம் 8234 முறை வந்து எரிச்சலூட்டுகிறது.சென்சார் வரவர பெரும் இம்சையார்.

கிருஷ்ணாவுக்கு இது மூனாவது படமாம். அண்ணன் விஷ்ணுவர்த்தன் சம்பாதிக்கிற காசை சினிமாவில் செலவழிக்கிற இந்த தம்பி தங்கத்தும்பி.நீங்க இன்னும் ஒரு முன்னூறு படமாவது நடிக்கனும் கிருஷ்ணமவராசா.

இந்தப்படத்தின் ஆடியோ வெளியீட்டு நிகழ்ச்சியில், ஒரு சிலரால், சின்ன சிலுக்கு’ என்று அழைத்து மகிழப்பட்ட,நாயகி பிந்து மாதவி, படம் முழுக்க மூக்குசிந்துமாதவியாக அழுதுகொண்டே இருப்பதால், அவர் சின்ன சிலுக்கா,அல்லது அந்தப்பெயரில் ஒரு இழுக்கா என்று முடிவு செய்யமுடியவில்லை.

இசை யுவன் ஷங்கர் ராஜா. 'ஆத்தாடி மனசுதான்’ பாடலில் மட்டும் லேசாக காத்தாடி பறக்க விடுகிறார். ரீரெகார்டிங் டொட்டடொய்ங் ‘தான்.நா.முத்துக்குமார் இப்போதெல்லாம் லிரிக் என்ற பெயரில் சும்மா கிறுக்’ கித்தள்ளுகிறார்.

படத்தின் தயாரிப்பாளர் பட்டியல் சேகர்  ஹீரோவின் தந்தையே என்பதால், அவர் கொடைக்கானல் மலை உச்சிக்குப்போகும் கொடூரமான முடிவையெல்லாம் எடுக்க வேண்டியதில்லை.
இந்த மாதிரி டைரக்டர்களின் சகவாசத்தை மலை அடிவாரத்தோடு நிறுத்திக்கொண்டால் போதும்.

மொத்தத்தில் கழுகு’ .இந்த மாதிரி டைரக்டர்கிட்ட பாத்துப் பழகு. இல்லைன்னா மலையிலருந்து நம்மள தற்கொலை பண்ண வச்சிருவாங்க.

டிஜிட்டல் கர்ணன்: பாஞ்சாலி பத்தினியா, பரத்தையா?

1964  ஜனவரி 14 அன்று பி. ராமகிருஷ்ணையா பந்துலு  இயக்கத்தில் வெளிவந்த ‘ கர்ணன்’ படத்தின், புதிய தொழில்நுட்ப வடிவமைப்பு படத்தை,  கடந்த திங்களன்று பிரசாத் லேப் தியேட்டரில் பார்த்தேன்.

கொஞ்சம் ஓவராக ’சவுண்டு ‘ விடுகிறார்கள் என்பதைத் தாண்டி, புதிய தொழில் நுட்பம் என்னவென்று படம் பார்த்து புரிந்துகொள்ள முடியாமல், விக்கிபீடியாவில் போய்ப்பார்த்தால் ஆங்கிலத்தில் இப்படி ஒரு விளக்கம் இருக்கிறது.

A digitally restored version of Karnan (with digital enhancements and restored audio to enable its screening in digital cinemas). இதைப்படித்து நான் மேலும் குழம்பியதுபோல் நீங்களும் குழம்பியிருந்தால் மன்னியுங்கள்.

தி.மு. க.பேச்சாளர் தீப்பொறி ஆறுமுகம் பாஷையில் சொல்வதானால்,’புரிஞ்சவன் புரிஞ்சிக்கோ, புரியாதவன் போயிக்கோ’ என்று அடுத்த விஷயத்தை நோக்கிப்போய்க்கொண்டே இருக்க வேண்டியதுதான்.

சுமார் 47 வருடங்களுக்கு அப்புறம் வெளியாகும் இப்படத்திற்கு நம் அண்ணன்மார்கள் எப்படியும் விமர்சனம் எழுதி நடிகர்திலகத்தின் நடிப்பை,அசோகன்,முத்துராமன், சாவித்திரி ஆகியவர்களின் நடிப்பை வியப்பார்கள் என்பதால், நான் அந்த விமர்சன ஏரியா பக்கம் தலை காட்ட விரும்பவில்லை.அதனால்  இது கர்ணன்’படவிமர்சனம் இல்லை. நீங்கள் கர்ணகொடூரத்துக்கும் ஆளாக வேண்டியதில்லை.

 ‘உயர்ந்த மனிதன்’  மாதிரி படத்தோடு ஒப்பிடும்போதெல்லாம், இதில் சிவாஜி, அசோகன் நடிப்பெல்லாம் வெறும்  மொக்கை தான். படத்தில் கத்துக்குட்டித்தனமான காட்சிகளும் ஏராளம்.

அதுவும் அசோகனாகிய துரியோதனின் மனைவி பானுமதியின் மடிக்கச்சையைப் பிடித்து சிவாஜியாகிய கர்ணன் இழுத்தையெல்லாம் என்னால் அசோகனைப்போல் சாதாரணமாக எடுத்துக்கொண்டு, ‘எடுக்கட்டுமா, கோர்க்கட்டுமா? என்று கேட்கத்தோன்றவில்லை. அவர்கள் இருவரும் முழிக்கிற திருட்டு முழி, துரியோதனனுக்கு தெரியாமல் ,கர்ணனும் பானுமதியும் ,  எதோ ‘கள்ளாட்டம்’ ஆடியிருப்பார்கள் என்பதாகவே படம் முழுக்க  எனக்குத்தோணுகிறது.

ஒரிஜினலில் இருந்ததை விட இப்போது பத்து நிமிடங்கள் ட்ரிம் பண்ணி மூன்று மணி நேரமாகப் படம்  ஓடுகிறது.

ஒரு முனிவரின் இச்சைப்படி, சூர்யபகவானுக்கு குழந்தை கர்ணனைப்பெற்றெடுக்கும் கேடி லேடி குந்தி தேவி, அந்தக்குழந்தையை ஆற்றில் விடுவதில் தொடங்கி, முதல் பாதி,அர்ஜுனன் அன் கோஷ்டி, துரியோதனன் அன் கோஷ்டி, பீஷ்மர்,சகுனி மாமா, கண்ணன் மாமா, திருதிராஷ்டிரர், தலைவிரிகோலமாக அலையும் பாஞ்சாலி,  நம்ம தமிழ்சினிமா அந்தணனுக்கு மட்டுமே வித்தை கத்துத்தருவேன்’ என அழிச்சாட்டியம் பிடிக்கும் முனிவர் ,என்று சுமார் நூறு கேரக்டர் வகையறாக்களை அறிமுகம் செய்ய தொகையறா பாடியதிலேயே முடிந்து போவதால்,லேசாகக் கொட்டாவி  மாதிரி ஒரு கெட்ட ஆவி வருவதைக் கட்டுப்படுத்த முடியவில்லை.

இலக்கியங்களில் பாஞ்சாலிக்கு கொடுத்த முக்கியத்துவம் ஏன் இந்தப்படத்தில் தரப்படவில்லை என்பது புரியவில்லை. அட்மாஸ்பியர் ஆர்டிஸ்ட் கணக்காக, எங்க கிட்டரெண்டு பாக்கெட் ஷாம்பு வாங்குனா அஞ்சு கிராம் சோம்பு இலவசம் என்பது மாதிரியே பல இடங்களில் வசனம் எதுவுமின்றி விசனத்தோடே நிற்கிறார்.

ஆனால், ‘’என்னவோய் சவுக்கியமா? ‘என்று கண்ணனைப்பார்த்து சகுனி கேட்டவுடன், ’இந்த லோகத்துல நம்ம ரெண்டு பேர் சவுக்கியத்துக்கு என்ன குறை வந்துடப்போகுது? என்று கண்ணன் கண்ணடிப்பதில் சூடு பிடிக்கும் இரண்டாவது பாதியை லேட்டஸ்ட் ட்ரெண்டுக்கு கதை பண்ணி  மாற்றினால் பத்து மங்காத்தா வசூலைப்பார்க்கலாம்.ஒரு நூத்தியோரு ரூபாய் அட்வான்ஸ் எடுத்து வையுங்கள் .அதுக்கு நான் கியாரண்டி.

கதையை சொன்னால் கண்டிப்பாக சுட்டுவிடுவீர்கள் என்பதால், மாற்றப்போகும் கதையில் யார் நடித்தால் நன்றாக இருக்கும் என்று சில கேரக்டர்களை என் மனக்கண்ணில் ஓட்டிப்பார்த்தேன்.

கர்ணனாக கர்னல் லெப்டினண்ட். டி.ராஜேந்தர் [ அந்த கவச குண்டலங்களோடு இவரைக் கற்பனை ’பன்னி’ப் பாருங்கள். இவரது குண்டலங்கள் மட்டுமே எட்டு மண்டலங்களுக்கு பேசும்.. அர்ஜுனனாக முத்துராமனுக்குப் பதில் ஜே.கே.ரித்தீஸ். துரியோதனனாக அசோகனுக்குப்பதில், பவர்ஸ்டார் சீனுவாசன்,அசோகன் மனைவி பானுமதி பாத்திரத்தில்’ இந்த உடை போதுமா என்று கேட்கிற காஷ்ட்யூமில் த்ரிஷா,கர்ணன் டி.ஆருக்கு ஜோடியாக ‘மீண்டும் நயன் தாரா,குந்தி வேடத்தில் குஷ்பூ, பாண்டவர்களின் கடைக்குட்டி சகாதேவனாக நம்ம குறளரசன், கலகம் விளைவித்து பல கேம் நடத்தும் கண்ணனாக அண்ணன் ராமராசன்.

இது சும்மா சாம்பிள்தான்.அட்வான்ஸுக்கு அடுத்த அமவுண்ட்,அதாவது சைடிஷ்’ வாங்குவதற்கு நீங்க இன்வெஸ்ட் பண்ணத்தயாராகும்போது, பட்டய கிளப்பும் பல விஷயங்கள் கிளம்பும்.

ஃப்ளாஷ்பேக் 1:

1983 என்று நினைக்கிறேன். சாத்தான்கள் நடமாட்டம் எதுவுமின்றி, நியூஸ் பேப்பர்களில் நல்ல  விஷயத்துக்காக மட்டுமே அப்போது பெயர் அடிபட்டுக்கொண்டிருந்த  எங்கள் அமெரிக்கன் கல்லூரிக்கு, எழுத்தாளர் ஜெயகாந்தன் வந்திருந்தார். எங்கள் கல்லூரி பாடத்திட்டத்தில் அவரது,’ பாரிஸுக்கு போ’ உள்ளிட்ட சில நாவல்கள் எப்போதும்  இருந்தன. அதனால் மாணவர்களுக்கும் அவருக்குமிடையில் ஒரு சந்திப்பு நடத்தினால்அவர்களுக்கு பயனுள்ளதாக  இருக்குமே என்று திட்டமிடப்பட்டே அவர் அழைக்கப்பட்டிருந்தார்.முதல் இரு தினங்கள் அவரது ‘யாருக்காக அழுதான்’ ஒரு நடிகை நாடகம் பார்க்கிறாள்’ போன்ற ஒரு சில படங்கள் எங்களுக்காக திரையிடப்பட்டு, பின்னர் கடைசி நாளில் அவரது ஒரு பேச்சு. இறுதியாக மாணவர்கள் அவரிடம் கேள்விகள் ஏதாவது இருந்தால் கேட்கலாம் என்று அறிவிக்கப்பட்டது.[ இந்த ஏற்பாடுகளையெல்லாம் தமிழாசிரியர் சுதானந்தா செய்திருந்ததாகவே எனக்கு ஞாபகம்.]

ஜெயகாந்தன் எழுத்தின் சுவாரஸ்யம் அவரது பேச்சிலும் நூறுசதவிகிதம் இருக்கும் என்பது அவரைப்பற்றிக் கேள்விப்பட்டவர்களுக்கு கூட தெரிந்திருக்கும்.அது தெரியாமல், எங்கள் மாணவர்களில் ஒருவர் அவரை மடக்கும் நோக்கில், ‘’ஐயா ஐந்து ஆண்மகன்களைத் திருமணம் செய்து கொண்டாளே  பாஞ்சாலி, அவள் பத்தினியா, பரத்தையா ? என்று யாரும் எதிர்பாராமல் ஒரு போடுபோட்டார்.

பதில் சொல்ல ஜே.கே. நொடியும் யோசிக்கவில்லை.

‘பத்தினியின் மகனுக்கு அவள் பத்தினி. பரத்தையின் மகளுக்கு அவள் பரத்தை’
.
ஜெயகாந்தனிடமிருந்து இந்த பதில் வந்ததும் கேள்வி கேட்ட மாணவரைத்தேடிய போது, அவர் ஆவியாகி அந்த இடத்தில் இல்லாமல் இருந்தார்.

ராஜா பைத்தியங்களிலேயே ராஜபைத்தியம் நான் தான்

எட்டு ஆண்டுகளாக செல்போனில் ஒரே ரிங் டோனை வைத்திருப்பவனை சரியான பைத்தியக்காரன் என்றே நீங்கள் அழைக்க விரும்புவீர்கள்,எனில் என்னையும் அப்படியே அழையுங்கள்.
2003-ன் இறுதியில் ‘பிதாமகன்’ ரிலீஸாகி சில தினங்களே ஆன நிலையில், நானும் பாலாவும், காரில் அமர்ந்து பீர் குடித்த படியே, ஏற்காடு மலையேறிக்கொண்டிருந்த போதுதான், முதன்முதலாக, ‘விருமாண்டி சண்டியரை நோக்கி ,சங்கீதத்தின் ஒரே சண்டியர்  ராஜா சொன்ன  ’உன்ன விட இந்த உலகத்தில் ஒசந்தது ஒண்ணுமில்ல’ பாடலைக்கேட்டு கிறங்கினேன்., மலையிலிருந்து இறங்கின உடனே என் செல்போனின் ரிங்டோனாக அன்று  அரியனை ஏறிய பாட்டு இன்று வரை இறங்கவில்லை.

சலங்கை ஒலி’ இது மவுனமான நேரம்...,‘நாயகன்’ நீ ஒரு காதல் சங்கீதம்...,’  புன்னகை மன்னன்’ ‘என்ன சத்தம் இந்த நேரம்?..., மவுனராகம்’ நிலாவே வா...,காத்திருக்க நேரமில்லை’ வா காத்திருக்க நேரமில்லை..., நாடோடித்தென்றல்’ ஒரு கணம் ஒரு யுகமாக..., சிப்பிக்குள் முத்து’ மனசுமயங்கும்..., சத்யா’ வளையோசை கலகலவென..... வரிசையில் நான் அந்தப்பாடலை இதுவரை ஆயிரம் முறையாவது கேட்டிருப்பேன். பாடலில் கமலுடன் நாட்டுப்புறத்தமிழில் கொஞ்சியிருந்த ஷ்ரேயா கோஷலுக்கு எனது இதயத்தின் இடது ஓரத்தில் சின்னதாக ஒரு கோயில் கூட கட்டியிருந்தேன்.’என்னவிட உன்ன சரிவரப்புரிஞ்சிக்க யாருமில்ல ...’ என்று ஷ்ரேயா எனக்காகப்பாடுவதாக நினைத்துக்கொள்வது சொல்லவொண்ணா சுகமாக இருக்கிறது.

தமிழ் நாடகத்தந்தை சங்கரதாஸ் சுவாமிகளின் பாடல்களைக் கேட்டு வளர்ந்திருந்தாலும், சின்ன வயசிலிருந்தே ராஜாவின் மீது வெறிகொண்ட ரசிகன் நான். அவருக்கு என்னைபோல் லட்சக்கணக்கில் பைத்தியங்கள் உண்டென்றாலும், ராஜா பைத்தியங்களிலேயே ராஜபைத்தியம் நான் தான் என்ற தலைமைப்பொறுப்பை என்னிடம் தயவு செய்து விட்டு விடுங்கள் . அப்படி விட்டுக்கொடுக்க நீங்கள் முன்வரும் பட்சத்தில் என் வாழ்நாள் முழுக்க,எம்.எல்.ஏ, மந்திரி, முதல் அமைச்சர், பிரதமர், அமெரிக்க பிரதமர் போன்ற எந்தப்பதவிகளுக்கும் நான் உங்களொடு போட்டியிட மாட்டேன் என்று எத்தனை ரூபாய் ஸ்டாம்ப் பேப்பரில் வேண்டுமானாலும் எழுதி கையெழுத்திடுகிறேன்.

வைரமுத்துவை எனக்குப் பிடிக்கும் அவர்  இளையராஜாவுடன் இருந்தவரை. பாரதிராஜாவை* எனக்குப் பிடிக்கும் அவர் படத்துக்கு ராஜா இசையமைக்கும்போது மட்டும். ‘நீ தானே என் பொன் வசந்தம்’ படம்  ,ஏ.ஆர். ரகுமான்,மற்றும் ஹாரிஸ்ஜெயராஜிடமிருந்து  எங்கள் ராஜா கைக்கு மாறும்போது, ‘படம் பிரமாதமா வந்துருக்காம்’ என்று சல்லி பைசா அட்வான்ஸ் வாங்காமல் மிஸ்டர் திகில் முருகன் பார்க்க வேண்டிய பி.ஆர்.ஓ. வேலையை நான் பார்க்க ஆரம்பித்துவிடுகிறேன்.

 
என்னைப்பொறுத்தவரை என் வாழ்வின் இனிமையான தருணங்கள் என்பவை ராஜாவின் பாடலைக் கேட்டுக்கொண்டிருந்த, கேட்டுக்கொண்டிருக்கும் தருணங்கள்தான்.இது சங்கீதம் அறிந்த அறியாத தமிழர்கள் சகலருக்கும் பொருந்தும் என்பதே என் கருத்து.

மிகவும் வறுமையான பின்னணியில் எட்டுப் பிள்ளைகளைப்பெற்று வளர்க்க, நாள்தோறும் நள்ளிரவில் தோட்டம் போய் தண்ணீர்பாய்ச்சிய என் தாய் லச்சம்மாளின் நினைவு வரும்போதெல்லாம் ‘பொன்னப்போல ஆத்தா என்னப்பெத்துப்போட்டா’ [என்னை விட்டுப்போகாதே ]பாட்டு கேட்டு அழுதிருக்கிறேன்.மனசு சரியில்லாத வேளைகளில், ‘நான் யாரு எனக்கேதும் தெரியலையே, ஆலோலம் பாடி ‘ மாதிரி பாடல்கள் கொண்டு என் கண்ணீர் துடைப்பது ராஜாவின் சுரங்கள்.ஒரு பூ மலர்வதைக்கூட சங்கீதமாகச் சொல்ல முடியும் என்று மலர்ந்த ‘வெள்ளி முளைத்தது’ [கீதவழிபாடு] கேட்டு விடிந்தது எத்தனை காலைப்பொழுதுகள் என்று சொல்லிமாளாது.

அமெரிக்கன் கல்லூரியில்* படித்துக்கொண்டிருந்தபோது, நானும் எனது நண்பர்களும். வகுப்பறைகளில் இருந்ததை விட ,கல்லூரிக்கு எதிரே இருந்த கணேஷ் டீ ஸ்டாலில் தான் அதிகம் நின்றிருப்போம்.

‘மண்வாசனை, கரையெல்லாம் செண்பகப்பூ’ நான் பாடும் பாடல், பயணங்கள் முடிவதில்லை,இளமைக்காலங்கள்’ என்று கேட்டு எங்களைத்திகைக்க வைப்பதையே ராஜா சலிப்பின்றி செய்து வந்தார்.கணேஷ்  ஸ்டாலில் டீ கேட்பதுவும், ராஜாவின் பாட்டீ  குடிப்பதுமே கல்லூரி காலங்களில் எங்களது முக்கியமான பணியாக இருந்தது.

ராஜாவை நான் முதன் முதலில் தனிப்பட்ட முறையில் சந்தித்தது, ஏ.வி.எம்.ஸ்டுடியோவில், ‘அதர்மம்’ பட பூஜை தினத்தன்று.

எனது அமெரிக்கன் கல்லூரி வகுப்புத்தோழன் ரமேஷ் என்கிற ரமேஷ்கிருஷ்ணன்*, அடையாறு திரைப்படக்கல்லூரியில் டைரக்‌ஷன் கோர்ஸ் முடித்து, அங்கேயே ஆக்டிங் கோர்ஸ் முடித்த சுரேஷ் என்பவரை தயாரிப்பாளராக அமைத்து தனது’அதர்ம ஆட்டத்தை ஆரம்பித்திருந்தான். பட நிறுவனத்தின் பெயர் ஜி.கே.ஃபிலிம்ஸ்.தயாரிப்பாளர்கள் அண்ணன் தம்பி மூன்று பேர்.ரமேஷ் மூத்தவர், சுரேஷ் நடுவர். சதீஷ் கடைக்குட்டி. 

ரமேஷ் கிருஷ்ணனுடன் சேர்ந்து சந்தித்த நாலைந்து சந்திப்புகளிலேயே நான் தயாரிப்பாள சகோதரர்களிடம் மிகவும் நெருக்கமாகிவிட்டேன்.

இந்த சமயத்தில் நான் ஆசிரியராகவும், பார்ட்னராகவும் இருந்த ‘சத்ரியன்’* அரசியல் பத்திரிகை தனது இறுதி மூச்சை நெருங்கிக்கொண்டிருந்ததால், நான் எனது பெரும்பாலான நேரங்களை டிஸ்கஷன் ,சீட்டு விளையாடுவது என்று ‘அதர்ம’ கோஷ்டிகளுடனேயே கழிக்க ஆரம்பித்திருந்தேன்.

நன்றாக நினைவிருக்கிறது.  அன்று அதிகாலை.ஏ.வி.எம்மில் லேசான தூறலடித்துக்கொண்டிருக்க பூஜைக்கு சரியான நேரத்தில் ராஜா இறங்கிவர, நான் தெய்வ தரிசனம் கிடைத்ததுபோல் சிலிர்த்து நின்றேன்.

முதல்நாளே  கொஞ்சம் மன ரீதியாக, ரமேஷ் உட்பட்ட டீமை நான் தயார் படுத்தியிருந்த வகையில்,ரமேஷ்கிருஷ்ணன் உட்பட படத்தில் பணியாற்ற இருந்த அத்தனை டி.எஃப்.டி.மாணவர்களும் தாங்கள் போட்டிருந்த முரட்டு ஜீன்ஸ் பேண்டையும் பொருட்படுத்தாது, பட்பட் என்று ராஜா காலில் விழுந்து நமஸ்காரம் வைத்தவுடன்’ இந்தப்படம் கண்டிப்பா நல்லா ஓடும் என்று என் மனசுக்குப் பட்டது.

அன்று மதியமே மனோ குரலில் ‘தென்றல் காற்றே ஒன்றாய்ப் போவோமா?’ என்ற பாடலையும்,அடுத்த இரு தினங்களில் மேலும் 4 பாடல்களையும் முடித்துத்தந்த ராஜாவின் ஒவ்வொரு அசைவையும் ரமேஷை விட்டு நகராமல் கவனித்துக்கொண்டே இருந்தேன். படம் பின்னணி இசைக்குப்போனபோது,திரைக்குள் நுழைந்துகொண்ட மந்திரவாதி போலவே எனக்குத்தெரிந்தார்.

அவருள் இருக்கிற இசை என்ற ஒன்றை எடுத்து விட்டால்,ராஜா என்பவர் இருந்துகொண்டிருக்கும் இடம் வெற்றிடமாய் மாறிவிடுமோ என்று எண்ணுமளவுக்கு முழுக்க முழுக்க இசையாகமட்டுமே அவர் இருந்தார், தெரிந்தார்.

அதற்கு அப்புறம் ‘சேது’ பிதாமகன்’ சமயங்களில் பாலாவுடன் , இளையஞானி கார்த்திக்ராஜா தனக்கு மேனேஜராக இருக்கச்சொல்லி வீட்டுக்கு அழைத்தபோது என்று பலமுறை மிக நெருக்கமாக ராஜாவை நான் சந்தித்திருக்கிறேன். ஆனால் இதுவரை ஒரு வார்த்தை கூட நான் பேச நினைத்ததில்லை.

பக்தனுக்கு தெய்வத்தோடு என்ன பேச்சு வேண்டிக்கிடக்கு?

ப்ளாக்’எழுதினா மந்திரிச்சி விட்ட மாடு மாதிரி ஆயிடுவ

அன்பு வலைஞர்களே வணக்கம்,

சுமார் மூன்று வாரங்களுக்கு முன்பு , தமிழ்மணம் நட்சத்திர நிர்வாகியிடமிருந்து, மார்ச்12 முதல் 19 வரை தமிழ்மணத்தின் சிறப்பு விருந்தினராக உங்களை தேர்வு செய்திருக்கிறோம். கலந்து கொள்ள சம்மதமா ? என்ற கேள்வியுடன் ஒரு கடிதம் வந்தது.  ஒரே ஒரு நண்பனுக்கு மட்டும் போன் செய்து தகவலைச் சொன்னபோது, அவன் சொன்ன பதில்,

‘மெயிலை நல்லா செக் பண்ணிப்பாரு அட்ரஸ் மாத்தி  அனுப்பிச்சிருப்பாங்க’.

நாலு மாசத்துக்கு முந்தி வரை “ப்ளாக்’ன்னா கருப்புக்கலர்ல  இருக்குமான்னு கேட்டுக்கிட்டு திரிஞ்ச நாதாரிக்கு அதுக்குள்ள ‘சிறப்பு விருந்தினர்’ அழைப்பு விட்டுட்டு, கெடா வெட்டி இவருக்கு பிரியாணி வேற போட்டு அனுப்புவாங்கன்னு கனவு காண்றான்  பாருங்க’- இந்த ரெண்டாவது வரி கண்டிப்பாக அவனது மைண்ட் வாய்சாகக்கூட இருந்திருக்கும்.

அவன் அப்படி நினைப்பதிலும் தப்பில்லை. காரணம் ’பொண்ணு ஊருக்கு புதுசு’ மாதிரி, இந்தப்பையன் ப்ளாக் ‘ஏரியாவுக்கு புதுசு.

நான் இதற்கு முன் நடமாடிய எல்லா இடங்களிலும் கணிசமான எண்ணிக்கையில்  கணினிகள் இருந்தபோதிலும், அதை ஒரு தீண்டத்தகாத பொருளாகவே பாவித்தவன் நான்.

‘’இன்னொரு பத்து நிமிஷத்துல ஆபிஸுக்கு வந்துருவேன். பாஸ்வேர்டைத் தட்டி சிஸ்டத்தை ஆன் பண்ணி வையிங்க’ என்று யாராவது சொன்னால், ஏதோ என் சொத்தில் பங்கு கேட்ட மாதிரி அவ்வளவு கோபம் வரும் எனக்கு.

அப்பிடி இருந்த நான் இப்பிடி ஆயிட்ட கதை பெருங்கதை என்பதால், அதை பிறகு பேசுவோம், சுருக்கமாக ஒரு வரியில் சொல்வதானால், கடந்த தீபாவளி அன்று பெய்த பதினாறு மணிநேர மழைதான் என்னை ஒரு ப்ளாக்கராக மாற்றியது என்று சொல்லவேண்டும்.

என்னங்க கிடந்து குழப்புறீங்க’?

இதுதான் என்னிடம் இருக்கும் சிக்கல். நான் எதைப்பற்றியாவது விளக்கப்போனால், அது உங்களை மேலும் கொஞ்சம் குழப்பமான இடத்தில் கொண்டு போய் நிறுத்தும்.

ஆனால் பெரியவங்க சொல்லியபடி பார்த்தால், குழம்பிய குட்டையில் தான் மீன் பிடிக்க முடியும். ஐ மீன், நீங்க என்கிட்ட மீன் பிடிச்சி, ஃப்ரை பண்ணியோ குழம்பு வச்சோ சாப்பிடனுமுன்னா கொஞ்சம் குழம்பித்தான் ஆகனும்.
 
கடந்த நவம்பர் 21- தான் நான் முதல் பதிவு போட்ட நாள். பார்த்திபனோட வித்தகன்’ படம் பார்த்துட்டு,லேசா மரை கழண்ட ஒரு நேரத்துல என்னோட க’ வலைப்பயணம் துவங்கிச்சி.

ஆரம்பத்துல ‘ப்ளாக்கை’ படிக்க வக்கிறதுக்கு பக்கத்து வீட்டுப் பிள்ளைங்களான மாயா, அஸ்மிதாவுக்கெல்லாம் ஐஸ்கிரீம் வாங்கித்தந்த வகையில நிறைய செலவாச்சி. ’’ஒவ்வொரு மேட்டர் படிக்கிறதுக்கும் ஒரு ஃபேமிலி பேக் ஐஸ்க்ரீம்  கேக்குறீங்களே, இது உங்களுக்கே அநியாயமாத்தெரியலையான்னு வடிவேலு மாதிரியே ‘அவ்வ்வுன்னு’ அழுதும் பாத்தேன்.

அந்த ஐஸ்நெஞ்சக்கார பிள்ளைங்க அசைஞ்சி குடுக்கிற மாதிரி தெரியலை.’’அங்கிள் எங்கள இப்படி கட்டாயப்படுத்தி படிக்க வைக்கிறதுக்கு கூட, இ.பி.கோ.வுல  ஏதாவது செக்‌ஷன் கண்டிப்பா இருக்கும். நாங்க வெறுமனே ஐஸ்கிரீமோட நிறுத்திட்டமேன்னு சந்தோஷப்படுங்க.’’

இப்படி எக்கலுக்கும் நக்கலுக்கும் ஆளாகி தான் ஏழெட்டு ஹிட்டுகளே வாங்க முடிந்தது.

எனது பிளாக்குக்கு ‘ஓஹோ புரடக்‌ஷன்ஸ் ‘ என்று சினிமாப் பெயர் வைத்திருந்தாலும், எனக்கு சகட்டுமேனிக்கு கவிதை வரும் என்பதால், நான்  இதில் ‘இலக்கியம்’ எழுத வேண்டும் என்றுதான் ஆரம்பத்தில் முடிவு செய்திருந்தேன்.

மேற்படி, இருவகையினரையும் பார்த்தபோது, மொள்ளமாரிகள் மற்றும் முடிச்சவிக்களின் எண்ணிக்கை, சினிமாவை விட  இலக்கிய ஏரியாவில் அதிகம் தென்பட்டதால்,சரி உடம்பில் கொஞ்சம் தெம்பு வரும்வரை சினிமாவே எழுதுவோம் என்று முடிவு பண்ணி இங்கே வந்தேன்.

• ‘’ப்ளாக்’ குல 20 வரிக்கு மேல எழுதுனா யாரும் படிக்க மாட்டாங்க’’
•  தகவல் சூடா இருந்தா போதும். ரைட்டிங் ஸ்டைல இன்னைக்கு எவனும் மதிக்கிறதில்ல’
• தலைப்பு கவர்ச்சியா இருந்தா போதும், உள்ள சப்ப மேட்டர்கூட எழுதலாம்’
• எப்பவுமே இடுகைகளைப் போடுறப்ப வாஸ்து பாத்துப் போடனும்’’-
• ‘ப்ளாக்’ எழுதுற வேலையெல்லாம் வேணாம்.அப்புறம் நீ மந்திரிச்சி விட்ட மாடு மாதிரி ஆயிடுவ’
• ‘சிலபேர் கனவுல வந்தெல்லாம் எழுப்பி,அப்புறம் நாளைக்கி என்ன எழுதப்போறன்னுல்லாம் கேப்பாங்க’

இப்படி ஆரம்ப  நாட்களில் சில குத்துமதிப்பான ஆலோசனைகள், எச்சரிக்கைகள் கிடைத்தன.

ஒரு மூன்று மாத முடிவில், ‘அண்ணே சினிமாவுல மவுத் டாக் கேள்விப்பட்டிருக்கேன். இப்ப உங்க ‘ஓஹோ புரடக்‌ஷன்ஸ்’ தான் மவுஸ் டாக்’ என்று ஒரு சக ப்ளாக்கர் பாராட்டி அலெக்‌ஷா ரேங்க்ல உங்க ப்ளாக் நிலவரம் படிங்க’ என்றபோது, அப்படி என்ற ஒன்று இருக்கிறதா? என்று பார்த்து,திரும்ப அவருக்கே போன் செய்து,

‘’என்னோட ப்ளாக் மதிப்பு 30ஆயிரம் யூ.எஸ். டாலர்கள்னு போட்டிருக்கே,அதை எதாவது சேட்டுக்கடையில வெறும் ஆயிரம் டாலருக்காவது அடமானம் வைக்கமுடியுமான்னு கேட்டப்ப, ‘ அடமானம் போகாது .உங்க மானம்தான் போகும்’ன்னு போனை வச்சவர் அதுக்கப்புறம் ஏன் என்கிட்ட பேசவேயில்லைன்னு இதுவரைக்கும் தெரியலை.

சரி அவர விடுங்க. ‘தமிழ்மணம்’ எனக்கு தந்திருக்க இந்த தங்கமான வாய்ப்பை,என்னால முடிஞ்ச வரைக்கும் சிறப்பா செய்ய விரும்புறேன்.

என்னோட தொழில்நுட்ப அறிவுகுறைவு காரணமா,இதுவரைக்கும் ப்ளாக் படிக்கிற உங்களோட முறையான தொடர்புல இல்லாம இருந்திருக்கேன்.இனியும் அது தொடர வேண்டாம்.

இந்த ஒரு வாரத்துல, கொஞ்சம் சினிமா,.. ஞ்சம் அனுபவம், ...சம் இசை,.....ம்  சமையல் குறிப்பு எழுதலாமுன்னு இருக்கேன்.அப்புறம்,  நீங்க ஒருவேளை விடுவிச்சிட்டா , என் சொத்து மொத்தத்தையும் உங்க பேருக்கே எழுதி வக்கிற மாதிரி ஒரு புதிரும் கைவசம் இருக்கு.அதை நாளைக்கு எழுதுறேன்.
 
வலைஞர்களே, அய்யா சாலமன் பாப்பையா சொன்னமாதிரி, வாங்க இந்த ஒரு வாரம் பழகிப்பாக்கலாம்.புடிச்சா உங்க வீட்டுப்பிள்ளையா நீங்க ஏத்துக்கோங்க. பிடிக்காட்டிஉங்க வீட்டு  பின்வாசல்வழியா  நானே சுவரேறி வந்திடுறேன்.

 ஆக, இனி, எப்பிடிப்பாத்தாலும் நான் உங்க வீட்டுத்தொல்லைதான்.

சேவற்கொடி -முக்கா கம்பத்துல பறக்குது மக்கா

அறிமுக இயக்குனர்களின் படத்தைப் பார்க்க நேர்கிற போது, நம்மையும் அறியாமல், அவர் யாரிடம் உதவி இயக்குனராக இருந்தார் என்ற கேள்விக்கு பதில் அறிந்துகொள்ள விரும்புகிறோம்.

பனேரி ஃபிலிம்ஸ் தயாரிப்பில் ‘சேவற்கொடி’ படத்தை இயக்கியுள்ள சுப்பிரமணியன், இயக்குனர் ராதாமோகனிடம் பணியாற்றியவர்.அவரது ‘அபியும் நானும்’ என்கிற பிரமாதமான படத்துக்கு வசனம் எழுதியவர்.
அப்ப படம் நல்லாருக்க வாய்ப்பிருக்குல்ல’ என்றது  உள்மனசு .

பிரபல நீச்சல் வீரர் அருண் பாலாஜி நாயகனாக நடிக்க, ஏற்கனவே ஒன்றிரண்டு சுமாரான படங்களில் நடித்து நம்மோடு ஒட்டும் உறவுமாய் இருக்கிற  மலையாள நடிகை பாமா நாயகியாக நடிக்க, சரியாக இரண்டு கோடியே பத்து லட்சத்தில் உருவான சின்ன[?] பட்ஜெட் படம் இது.

தனது படத்தைப்பற்றி பேட்டி தரும்போதெல்லாம், திருச்செந்தூரில் முருகனுக்கு நடத்தப்படும் சூரசம்ஹாரத்தைப் பின்னணியாகக்கொண்ட படம் இது. கதை முதல் ஆண்டின் சூரசம்ஹாரத்தில் துவங்கி அடுத்த ஆண்டின் சூரசம்ஹாரத்தில் முடிகிறது என்பதாகவே பேசியிருப்பார் இயக்குனர் சுப்பிரமணியம்.

கேட்பவர்களுக்கு சுவாரசியமாக இருக்கட்டும் என்றோ, அல்லது படம் பிரம்மாண்டமானது என்ற இமேஜ் வரட்டும் என்று நினைத்தோ அவர் அப்படி சொல்லியிருக்கக்கூடும். உண்மையில் படத்துக்கும் சூரசமஹாரத்துக்கும்,அதை ரெண்டு முறை காட்டினார்கள் என்பதைத்தாண்டி, எந்த சம்பந்தமும் இல்லை.

அதைத்தெரிஞ்சிக்க முதல்ல கதையக் கேளுங்க மக்கா.

திருச்செந்தூர் அருகே ஒரு மீனவ கிராமத்தில் வசிக்கும் நடுத்தரக் குடும்பத்தைச் சேர்ந்தவர் அருண் பாலாஜி.அவருக்கு எல்லாப் பசங்களையும் போல், பாமாவை பஸ் ஸ்டாப்பில் கண்டதும் காதல் வருகிறது.[ அடுத்த வாட்டி லொகேஷனை மாத்துங்க பாஸ்]

கதையின் இன்னொரு ஏரியாவில், மீன் வேனை சம்பளத்துக்கு ஓட்டிக்கொண்டிருக்கும் பவன், சொந்தமாக வேன் வாங்குவதற்காக, அக்காளை அடமானம் வைத்து நடிகர் வடிவேலு பேக்கரி கடை வைத்தது போல், தன் தங்கச்சியை தன் முதலாளிக்கு, இரண்டாம் தாரமாக கட்டிவைக்க முயல்கிறார்.

இதை ஒட்டி ,பவனின் தங்கை தன் காதலனுடன் ஓடிவிட, பரிசாகக் கொடுத்த வேனை முதலாளி பிடுங்கிக்கொள்கிறார்.  வடிவேலுவுக்காவது பேக்கரி கிடச்சது. நம்ம பயலுக்கு கிடைச்ச வேனும் போச்சே’ என்று சுற்றி இருப்பவர்கள் கிண்டலடிக்க, ’வேன் போச்சே’ என்று வெறிகொள்ளும் பவன், அதற்கு அருண்பாலாஜிதான் காரணம் என்று தவறாக நினைத்து, தனது வேனை வைத்து அருண்பாலாஜியின் பைக்கில் மோத அந்த விபத்தில் அருணின் அம்மா இறக்க, ஆறு மாதங்கள் கழித்து, பவன் மூலமே அந்த உண்மையைத் தெரிந்து கொள்ளும் அருண், பவனைப் பழிவாங்க , பதிலுக்கு அருணைப் பழி வாங்க பவன் அலைய, கதையும் இடைவேளைக்கு அப்புறம் அடுத்து எங்கே போகலாம் என்று திக்கு  தெரியாமல் அலைகிறது.

பார்க்க லட்சணமாக இருக்கும் அருண்பாலாஜிக்கு, தலைமுடியில் மட்டும் யாரோ பான்பராக் போட்டு துப்பியது போல் ஒரு செம்பட்டைக்கலர்  ஒட்டவில்லை.நடிப்பில் இப்போதைக்கு ரன்னர் அப் தான்.

அதேபோல் பார்க்க பட்சணமாக இருக்கும் பாமாவை தமிழ் சினிமாவுக்கு வாம்மா’ என்று வாய் நிறைய அழைக்கலாம்.அப்படி ஒரு ஹோம்லி லுக்.சின்னச்சின்ன எக்ஸ்பிரஷன்களில்  மனசை அள்ளுகிறார்.

பவனின் தங்கையாக இரண்டே காட்சிகளில் வரும் பெயர் தெரியாத பாப்பா, பார்க்க இலியானா போலவே இருப்பதால் , சீக்கிரமே போகப்போறீங்க டாப்பா.

இசை ’எங்கேயும் எப்போதும்’ சத்யா. அங்கே அப்போது’ இருந்த அளவு இல்லையென்றாலும் ஒன்றிரண்டு பாடல்களை முனுமுனுக்க வைக்கிறார்.

 தன் விருப்பப்படியே படத்தின்  அனைத்துப்பாடல்களையும் எழுதியிருக்கும் வைரமுத்துவின்  காதல் வரிகளில், வறுமையும்,வெறுமையும், முதுமையும் தாண்டவமாடுகிறது.[ சின்னப்பசங்க பொழைச்சிப்போகட்டும் வழிவிட்டு, உலக இலக்கியம் படைக்க கிளம்புங்க கவிஞரே..]

சமீபத்தில் குப்பைகளாய் வந்து விழுந்து கொண்டிருக்கும் புது இயக்குனர்களுக்கு மத்தியில் சுப்பிரமணியன், கொஞ்சம் குறிப்பிடப்பட வேண்டியவர்தான். பாடல் காட்சிகளைப்படமாகியிருக்கும் விதத்தில்,நடிகர்களிடம் இயல்பான நடிப்பை வாங்கிய விதத்தில்,  சூப்பர்மணியான இயக்குனர்தான்.

ஆனால் படத்தின் முதல் பாதியில் நல்ல நம்பிக்கையோடு நம்மை பயணிக்க வைத்தவர், இரண்டாவது பாதியில், வழக்கமான காட்சிகளை வைத்து வழுக்கியிருக்கிறார். அதுவும் கதையில் திடீரென புகுந்த இரு அண்ணாச்சிகளும் சீரியஸ்னஸ்  என்ற பெயரில் காமெடி பிட்’களாக காட்சி அளித்தது டைரக்டருக்கு பெறும் சறுக்கல்.

கதை நடக்கிற திருச்செந்தூர் பாஷையிலேயே சொல்றதுன்னா, கொடி முக்காக் கம்பத்துலதான் பறக்குது மக்கா.

மிஸ்டர் ஹாரிஸ் உங்க பாட்டு ரொம்ப லேட்டுதான் ’- உதயநிதியின் ஹார்ட்டிலே ஹீட்டுதான்

நேற்று சத்யம் தியேட்டரில் நடந்த ‘ஒரு கல் ஒரு கண்ணாடி’ படத்தின் ஆடியோ வெளியீட்டு விழாவைத்தொடர்ந்து, இன்று ஹோட்டல் அக்கார்ட்’ டில் OK OK'  டீமின் பிரஸ் மீட் நடந்தது.

முன்பெல்லாம் பிரஸ் மீட்களுக்கு ஐம்பது முதல் அறுபது பேர் வரை வந்து கொண்டிருந்தார்கள். இப்போது வரவர பிரஸ் மீட்களில் ‘உதயம்’ தியேட்டர் ஹவுஸ் ஃபுல் காட்சி போல்,டேப் ரெகார்டர் , வாக்மேன், வானொலி, இணையம்,இணைவோம் என்று பல நூற்றுக்கணக்கில் குவிய ஆரம்பித்துவிட்டார்கள்.

அதுவும் வீடியோ கேமராவுடன் அலையும் ஒளிப்பதிவாளர்கள்,நடிகைகள் வந்தவுடன் அவர்களை ஷூட் பண்ணுகிறேன் பேர்வழி என்று பண்ணுகிற அலம்பல் இருக்கிறதே... அது பின் வரிசைக்காரர்களின் தீராத புலம்பல்.

‘’ பாஸ் [எ] பாஸ்கரன்’ முடிந்தவுடன் அடுத்து என்ன படம் பண்ணலாம் என்பது குறித்து எந்த முடிவும் எடுக்காமல் இருந்த போது, தயாநிதி சாரை என் படத்தின் விநியோகஸ்தராகத்தான் சந்தித்தேன். அப்போது தான் நடிக்கும் எண்ணத்தில் இருப்பதாவும்,ஏதாவது கதை இருந்தால் சொல்ல முடியுமா என்றும் கேட்டார்.

 நான் உடனே என்னிடமிருந்த ஒன் லைன் ஒன்றை ஒரு நிமிடத்தில் சொல்லி முடிக்க , அவர் அதை கெட்டியாகப் பிடித்துக்கொள்ள உருவானதுதான் இந்த ‘ஒரு கல் ஒரு கண்ணாடி’ என்று தனது பேச்சைத்துவங்கிய இயக்குனர் ராஜேஷ், உதயநிதியைப் பற்றிப் பேசிய போது காட்டிய அந்நியோன்யத்தைப்பார்க்கும்போது, அவர் எந்த நிமிடமும் தான் ஒரு அரசியல்வாதி வீட்டுப்பிள்ளை போல நடந்துகொள்ளவில்லை என்பதைப் புரிந்துகொள்ள முடிந்தது.

 இதுல யார் கல் , யார் கண்ணாடி?

அப்பிடியெல்லாம் பிரிச்சி சொல்ல முடியாது. காதல்ல ,எதுவும் நிரந்தரம் கிடையாது. கொஞ்ச நேரத்துல எல்லாமே மாறிப்போகுது. ஒரு சீன்ல உதயநிதி கண்ணாடியா இருப்பார் ஹன்சிகா கல்லாயிடுவாங்க. அடுத்த சீன்ல இதுவே தலைகீழா இருக்கும்.

உதய நிதி நீங்க எதிர்பார்த்த அளவு பெர்ஃபார்மென்ஸ் பண்ணியிருக்காரா?

கண்டிப்பா. ஆனா அதுக்கு முதல் காரணம் நாங்க கதை ரெடியான உடனே நிறைய ஒத்திகை பாத்தோம். ஆரம்பத்தில லவ் சீன்ல ரொம்ப சொதப்பலா பண்ணினார். என்ன சார் இந்த சீன்ல நல்ல ரொமான்ஸ் மூடு வேணும் சார்னு சொல்லுவேன். உடனே அவர், சார் ஹீரோயினுக்குப் பதில் அசிஸ்டெண்ட் டைரக்டரை வச்சி ஒத்திகை பாத்தா எனக்கு எப்பிடி சார் ரொமான்ஸ் வரும்? ஷூட்டிங் ஸ்பாட்ல ஹன்ஷிகா வந்து எதிர்ல நிக்கிறப்ப கரெக்டா பண்ணிருவேன் சார்னு சொல்லுவார். அதே மாதிரியே பண்ணிட்டார். உதயநிதி சாருக்கு கண்டிப்பா இது முதல் படம் மாதிரி இருக்காது.

அடுத்து படத்தின் நாயகன் உதயநிதி பேச ஆரம்பித்தார்.

‘’இந்தப்படத்தோட ஹீரோ வாய்ப்பு டைரக்டர் ராஜேஷ் கிட்ட கேட்டு வாங்கின வாய்ப்புன்னு சொல்றதுல எனக்கு எந்த வித தயக்கமும் இல்ல.’ சிவா மனசுல சக்தி’ பாத்ததிலருந்தே நான் ராஜேஷோட தீவிர ரசிகனாயிட்டேன்.’ஒரு கல் ஒரு கண்ணாடிக்கு அப்புறம் அவர் மேல அன்பு இன்னும் ஜாஸ்தியாயிடுச்சி. அடுத்த படமும் என்னை வச்சிப்பண்ணமாட்டாரான்னு ஆர்வமா இருக்கேன்.

ஆனா, நீங்க ஆரம்பத்துல மிஷ்கின் டைரக்‌ஷன்ல அறிமுகம் ஆகுறதா இருந்து ஃபோட்டோ ஷூட் கூட நடந்ததே?

ஆமா நடந்தது உண்மைதான். ஆனா யுத்தம் செய்’ மாதிரியான ஒரு சீரியஸ் சப்ஜெக்ட் தான் அவர் என்னை வச்சி இயக்குறதா இருந்தார்.  வடிவேலு வசனம் மாதிரி , ’அதுக்கு’ நான் சரிப்பட்டு வரமாட்டேன்னு தோணிச்சி. அதனால அந்தப்படத்துல நடிக்கிற எண்ணத்தை டிராப் பண்ணிட்டேன்.

ஹன்ஷிகாவும் உங்களுக்கும் உள்ள நெருக்கமான காட்சிகளைப் பாத்துட்டு திருமதி உதயநிதி  என்ன சொன்னாங்க? என்று தயங்கிக்கேட்டால், ‘ஏன் பாஸ் அந்த வயித்தெரிச்சலைக்கேக்குறீங்க,
ஆக்சுவலா எனக்கும் ஹன்ஷிகாவுக்கும் நெருக்கமான காட்சிகளே படத்துல இல்ல. சந்தானத்துக்கும் எனக்கும் தான் படத்துல நிறைய நெருக்கமான காட்சிகள் இருக்குது. அதைப்பாத்து வீட்ல எதுவும் பெருசா ஃபீல் பண்ணலை’’
சந்தானத்திடம் பழகிய தோஷத்தில் சிரிக்காமல் ஜோக்’கடிக்கும் உதயநிதி படத்தின் இசையமைப்பாளர் ஹாரிஸ் ஜெயராஜ் மீது மட்டும் செம காண்டில் இருக்கிறார் என்பது அவரது பேச்சில்  பல இடங்களில் தெரிந்தது.
‘’ஆரம்பத்துல கதை ரெடியான உடனே அவர் கிட்டருந்து பாட்டு கிடைக்காம மூனு மாசம் வெயிட் பண்ணினோம். இப்பவும் ரீ-ரெகார்டிங்கை எப்ப முடிச்சித்தருவார்ன்னு தெரியாததால, படத்தோட ரிலீஸ் தேதியை எங்களால சொல்ல முடியலை’’என்று மனசுக்குள் எதையும் வைத்துக்கொள்ளாமல் பிரஸ்மீட்டில் பொங்கினார் உதயநிதி.

மிஸ்டர் ஹாரிஸ் உங்க பாட்டு தான் லேட்டுதான் ,.. உதயநிதி ஹார்ட்டுல ஹீட்டுதான்..

பாஸு பாஸுன்னு கூப்பிட்டே என்ன லூஸாக்கிட்டீங்களேடா

இன்று மதியம் 2 மணி அளவில்,மீண்டும்  நினைவூட்டும் விதமாக ,பி.ஆர்.ஓ. வெங்கட் ,’’பாஸ்  பிரசாத் லேப் தியேட்டர்ல 3 மணிக்கு ‘பத்திரமா பாத்துக்கங்க’ ஷோ இருக்கு வந்துருங்கபாஸ் ’ என்றார் .

’எப்பிடியெல்லாம் டைட்டில் வக்க ஆரம்பிச்சிட்டாங்க, என்று யோசித்தபடி, படம் ரொம்ப ஏடாகூடமா இல்லாம எங்கள பத்திரமா பாத்துக்குவீங்களா பாஸ் ? ‘ என்று அவரைக் கேட்க நினைப்பதற்குள் போனை வைத்துவிட்டார்.

குடும்பத்தையும், காதலையும் கலந்துகட்டி குருமா பண்ணியிருந்தார்கள்.மூன்று நண்பர்கள். அதில் ஒருத்தனுக்கு மட்டும் நாயகி மீது காதல் வருவது. மீதி ரெண்டுபேரும் ஐடியா குடுப்பது. வீட்டில் நாயகிக்கு வேறு மாப்பிள்ளை பார்க்க, அதை நண்பர்களுடன் போய் நாயகன் கலைப்பது...இப்படியே கதை எழுதி எத்தனை காலத்துக்குத்தான் பிழைப்பது என்று யோசிக்கமாட்டார்களா? என்று யோசித்தபோது என்னை நினைத்தே எனக்கு அழுகை வந்தது.

இந்த மாதிரி படங்கள் பார்த்து எவ்வளவோ அடிகள்  வாங்கி உடம்பெல்லாம் தழும்பாக இருந்தாலும், அதற்கு தைலம் தடவிக்கொண்டு மீண்டும் மீண்டும் போவது  நமக்கு வாடிக்கையாகி விட்டது.

பிறகு எப்பிடி இவங்க நம்மள  பத்திரமா பாத்துக்குவாங்க?

படத்தில் ஒரு வசனம்;  குண்டு நாயகிக்கு நிச்சயிக்கப்பட்ட மாப்பிள்ளை ஹீரோவையும் அவரது நண்பர்களையும் பார்த்துக்கேட்பது, அப்படியே டைரக்டர் நம்மைப்பார்த்து கேட்பது போலவே இருந்தது.’’பாஸு..பாஸுன்னு கூப்பிட்டே என்னை லூஸு ஆக்கிட்டீங்களேடா?’

நியாயமாக , மூன்றாவதாக இருக்கும்  மேற்படி டிசைனில், மரத்தில் கட்டித் தொங்கவிடப்பட வேண்டியவர்கள் இயக்குனரும், தயாரிப்பாளரும்தான்.

                  
  எனக்கென்னவோ, 3’ படம் ரிலீஸாகிற வரை தனுஷ், ஐஸ்வர்யா, அனிருத் போன்றவர்கள் பற்றி எழுதாமல் யாரும் உயிர் வாழ முடியும் என்று தோணவில்லை.

‘அடுத்த படத்துக்கெல்லாம் நானே மியூசிக் பண்ணப்போறேன் ‘ என்கிறார் தனுஷ். ஐஸ்வர்யாவோ இன்னும் ஒரு ’கட்டை’ மேலே போய், ‘கொலவெறி,  ஒரு கூட்டு முயற்சி மாதிரி, எங்க வீட்டுமுயற்சி’ என்கிறார்.

இன்னும் சில சிம்பு மாதிரி நல்ல தம்பிகளோ, ‘ ‘3’ ஆடியோவுல அந்த ஒரு பாட்டைத்தவிர வேற எதுவுமே ஷெல்ஃப் எடுக்கலை பாத்தீங்களா?’ என்கிறார்கள்.

ஆனால் இவை எவற்றையும் காதில் வாங்கிக்கொள்ளாமல் 3’ படத்தின் ஃபைனல் மிக்ஸிங்கில் இருக்கும் அனிருத், தன்னைத்தேடி வருகிறவர்களிடம் சம்பளமாக ஒரு விரலை நீட்டுகிறாராம்.

இதைப்பார்ப்பவர்கள் ஆரம்பத்தில் சற்றுக்குழப்பமடைந்து, சரி சின்னப்பய புள்ள படத்துக்கு மியூசிக் பண்றதுக்கு ஒரு கடலைமுட்டாய் பாக்கெட் கேக்குது போலருக்கு’என்று கன்ஃபியூஸ் ஆகி, சற்று நேரத்திற்குப் பின்னர்தான் அந்த விரல் ஒரு கோடியைக் குறிக்கிறது என்று புரிந்துகொள்கிறார்களாம்.

தான் ஒரு கோடி சம்பளம் கேட்பதற்கான காரணமாக அனிருத் கருதுவது, ‘கொலவெறி மாதிரி ஒரு பாடலை இதுவர தமிழ்சினிமா கண்டதில்ல, முதல் படத்துக்கே இந்திப்படம் பண்ணச்சொல்லி இத்தன பேர் தேடி வந்ததில்ல..மொழி தெரியாதவங்க கூட ஒரு பாட்டை இந்த அளவுக்கு நொந்ததில்ல..    ல்ல .. ல்ல ..ல்ல என்று பெரும் தொல்லையாய் .இப்படியே நீண்டுகொண்டு போகிறது அந்த காரண பட்டியல்.

இதுபோக, பாக்கியராஜின் வாரிசு சாந்தனுவை வைத்து ‘கண்டேன்’ படத்தை இயக்கிய இயக்குனர்,தனது அடுத்த படத்தில் ஹீரோவாக நடிக்கும்படி, பார்ப்பதற்கு அம்மாஞ்சி மாதிரியே இருக்கும்  அனிருத்தை அநியாயத்துக்கு வற்புறுத்தினாராம்.[ டைரக்டரண்ணா பக்கத்துல இருக்க கண் டாக்டரைக் கொஞ்சம் பாத்து செக் அப் பண்ணிக்கங்கண்ணா.]

அனிருத்துக்கு ஒரு ஐடியா, தமிழிலும், இந்தியிலும் இப்போதைக்கு உங்களுக்கு ஒரு கோடி தர யாருக்கும் மனசு வராது. ஆனால் தெலுங்கில் ஒரு’கோடி’ கேட்டால் உடனே கொடுத்துவிடுவார்கள்.அங்கே கோடி என்றால் கோழி என்று அர்த்தம்.சொல்லும்போதே ஜிஞ்சரா,பெப்பரா என்றும் விளக்கமாக சொல்லிவிட்டால் அவர்களுக்கு பரிமாறுவதற்கு ஈஸியாக இருக்கும்.உங்க உடம்பைத் தேத்துவதற்கும்  உங்களுக்கு அந்த கோடியை விட இந்த ‘கோடி’தான் அவசியமும் கூட.

'அரவான்’ வசூலில் விரைவில் குறைவான்

2009-ம் தேதி ஜூலை 11ம் தேதி பின்னிரவு உறக்கம் பிடிக்காமல் மன அழுத்தத்தில் அரட்டிக்கொண்டிருந்தேன்.இந்த நூற்றாண்டை விட்டு பறந்துவிடத் துடிக்கும் வேகம் உடலெங்கும் நிறைந்திருந்தது.நூறு சேனல்களில் மனம் லயிக்காமல், தொலைக்காட்சியை அணைத்துவிட்டு தரையை வெறித்துப்பார்த்துக்கொண்டிருந்தேன். என் இரண்டு வயது மகன் ஆடும் மரக்குதிரை காற்றில் ஆடியபடி இருந்தது.அதன் காலடியில் வாசிக்கத்துவங்கி,பாதியில் விட்டிருந்த சு.வெங்கடேசனின் ‘காவல்கோட்டம்’ நாவல் இருந்தது.வாசிக்க ஆரம்பித்த ஒரு சில மணித்துளிகளில் நாவலில் படித்த ஒரு சம்பவம் தான் ‘அரவான்’ கதை. அரவானின் பிறந்த நாளும் என் பிறந்த நாளும் அன்றே ஜூலை12.2009. நூற்றாண்டின் திரைச்சீலை விலக்கி மழையில் நனையும் கனவொன்றுடன் வருகிறான் அரவான். - ‘அரவான்’ பட அழைப்பிதழில்’ ஆல்பம்’ பட  இயக்குனர் வசந்த பாலன். [நம்ம ஆளுங்க கிட்ட ஓப்பனிங் எப்பவுமே நல்லாத்தான் இருக்கு ] தமிழ் சினிமாவில் நெடுங்காலம் தொட்டே கதாசிரியர்களுக்கான,அதுவும் இலக்கியவாதிகளுக்கான, சரியான அங்கீகாரத்தைக் கொடுப்பதில்  சினிமாக்காரர்களில் பெரும்பாலானவர்கள் மொள்ளமாரித்தனமாகவே நடந்துகொண்டிருக்கிறார்கள். நாஞ்சில் நாடனின் ‘தலைகீழ்விகிதங்கள்’ நாவலை ‘சொல்ல மறந்த கதை’என்று எடுக்கிறபோது, அந்த நாவலையும் அதை எழுதியவரின் பெயரையும் இருட்டடிப்பு பண்ண ,படம் எடுப்பதற்கு எடுப்பதைவிட அதிக பிரயத்தனம் எடுத்துக்கொள்கிறார்கள்.இதுபோன் ற இருட்டடிப்பு கதைகள் நூற்றுக்கும் மேல் சொல்லலாம்.அந்தப்பஞ்சாயத்து அப்புறம். அந்த வகையில் நாவலாசிரியர்களுக்கு தனது படங்களில் பெரிய முக்கியத்துவம் தந்து வருபவர் வசந்த பாலன். கடந்த ஆண்டு சிறந்த நாவலுக்கான சாகித்திய அகாடமி விருது பெற்ற சு.வெங்கடேசனின்,’காவல் கோட்டம்’ என்ற 1057 பக்க நாவலில் சுமார் 47 பக்கத்தை மட்டும் வசந்தபாலன் தன் படத்துக்கான கதையாக எடுத்துக்கொண்ட கதையே அரவான்’.  எப்பப்பாத்தாலும் நாமே படத்தின் கதை என்ன என்று ஏன்  எழுத வேண்டும் என்று யோசித்ததில், எழுத்தாளர் சு. வெங்கடேசன் வார்த்தைகளிலேயே கதை என்ன என்று பார்ப்போம். . நம்முடைய தமிழ்ப் பாரம்பரியத்தின் மரபில் நல்ல களவாணியை காவல்காரனாக நியமித்திருக்கிறார்கள். தமிழ் மரபின் விஷயம் அது. 1812 இல் கிழக்கிந்திய கம்பெனி கையில் ஆட்சி இருக்கும்போது அவன்தான் ஒரு சிஸ்டத்தை உருவாக்குகிறான். கிராமக் காவல்காரர்களை நாம் என்ன செய்வது என்ற கேள்வி அப்போதுதான் வருகிறது. அப்போது என்ன சொல்கிறார்கள் என்றால்... கிராமத்தைப் பற்றி எல்லா விஷயங்களும் தெரிந்த ஒரே ஆள் அவன்தான். அவனை விட்டுவிட்டு ஒரு அமைப்பை ஏற்படுத்தினீர்கள் என்றால் நம்மால் இந்த சமூகத்தைப் புரிந்துகொள்ளமுடியாது. எனவே இந்த அமைப்பின் அடிநிலை ஊழியனாக அவனைச் சேர்த்துக்கொள்ளவேண்டும் என்று அவர்களைச் சேர்த்துக்கொள்கி றார்கள். கிழக்கிந்திய கம்பெனி ஆட்சியில் கிராமக் காவல்காரர்களை வில்லேஜ் போலீஸ் என்று அழைத்திருக்கிறார்கள். கையில் ஒரு வில்லையைக் கட்டியிருப்பார்கள். 1812 இல் கொடுத்த அந்த வில்லை என்னிடம் இருக்கிறது. அதன் நடுவில் விபி என்ற ஆங்கிலத்தில் இருக்கும். சுற்றிலும் வில்லேஜ் போலீஸ் என்று போடப்பட்டிருக்கும்’ என்று கதையின் பின்புலத்தைப்பற்றி சொல்கிறார் சு.வெ. . அப்படிப்பட்ட வில்லேஜ் போலீஸ்களில் ஒருவரான ஆதியை பலி கொடுப்பதற்காக ஒரு கிராமமே தேடிக்கொண்டிருக்கிறது.  ஒரு பத்து வருடம் தலைமறைவாக வாழ்ந்துவிட்டு வந்தால், மன்னித்து விட்டுவிடுவார்கள் என்று ஆதியின் மாமனார் சொல்ல, ஊரு விட்டு ஊரு வந்து, சின்னா என்ற தன் பேரு விட்டு வேறு பேரு வந்து, பசுபதியின் ஊரில் வாழும் ஆதி, ஒன்பதாவது வருடத்தில் தனது ஊர்க்காரர்களிடம் மாட்டிக்கொண்டு, வித்தியாசமாக உயிரை விட்டு, தெய்வமாகிப்போவதுதான் அரவான். ‘களவை’ தொழிலாக செய்து வருபவர்களைப்பற்றிய வரலாற்றுக்கதை.அவமானகரமாக நினைக்கவேண்டிய களவு சமாச்சாரத்தை, பொத்திப்பொத்தி சேகரித்து ஏன் வரலாறாகத்திரிக்கிறார்கள் என்பது புரியாத புதிர். இப்படி ஒரு கேள்வியை யாரும் கேட்டுவிடக்கூடாது என்று நினைத்தோ என்னவோ, படத்தை திடு திப்பென்று மரண தண்டனைக்கெதிரான படமாக மாற்றி ‘மரண தண்டனையை ஒழிப்போம்’ எ ஃபிலிம் பை வசந்த பாலன்’ என்று முடிக்கிறார். ஏன் பிரதர் படமே ஒரு மரணதண்டனையா? கேள்வி கேக்குறது ரொம்ப ஈஸி பிரதர்.எதையுமே அனுபவிச்சிப்பாத்தாதான் தெரியும். சமீபகாலமாக தமிழ்சினிமா டைரக்டர்கள் பலருக்கு பீரியட்கதைகளை  படம் எடுக்கும் ஆவல் அதிகரித்திருக்கிறது. அவர்களையெல்லாம் ரசிகர்கள் அதிபுத்திசாலிகளாக நினைத்துக்கொள்வார்கள் என்பது அவர்களின் எண்ணமாக இருக்கிறது.ஒரு கொடுமை என்னவென்றால், இந்த மாதிரி எடுக்கப்படுகிற பீரியட் கதைகளில், பீரியடும் இருப்பதில்லை, கதைகளும் இருப்பதில்லை. சில பெண்கள் மட்டுமே இருக்கிறார்கள். வசந்த பாலனின் இந்த ‘அரவானும் அந்த வரவான் தான். ஒளிப்பதிவு பற்றி மீடியாக்களில்  மிரட்டலாக வந்த செய்திகள் எதையும் படத்தின் ஒளிப்பதிவு நியாயப்படுத்தவில்லை.இந்த லட்சணத்தில் இவருக்கு இந்த வருடத்துக்கான தேசிய விருதுக்கு வேறு புக் பண்ணி வைத்திருக்கிறார்களாம். இந்த ஒரு படத்தில் தான் நமது எதிர்காலமே அடங்கியிருக்கிறது என்று நினைத்தோ, அல்லது கேமராமேன் மாதிரியே நாமளும்  ஒரு தேசிய விருது வாங்கி  அதை ஆளுக்கு பாதியாய் பிரித்துக்கொள்ளலாம் என்று நினைத்தோ,  என்னவோ, ஆதியும், பசுபதியும் நம் உயிரை எடுத்து நடித்திருக்கிறார்கள். இடைவேளைக்கு அப்புறமே வரும் தன்ஷிகாவுக்கு,’இடை’ வேலைகள் மட்டுமே கொடுத்திருக்கிறார் இயக்குனர். அந்த நிலாப்பாடலில் ஆதியும், தன்ஷிகாவும் சேர்ந்து  இளமைக்கு ஒரு விழா எடுத்திருக்கிறார்கள். மேலும் சில வித்தியாசமான பாடல்களுடன்  ஆச்சரியம் ஆனால் உண்மை எனும்படி இருக்கிறது பாடகர் கார்த்தியின் இசையமைப்பு. அதிலும் பின்னணி இசையில் கார்த்தி ரொம்பவே நேர்த்தி.வீட்டுல எடுக்கச்சொல்லுங்க ஆரத்தி. படத்தின் முன்பாதி, அடிபட்டுக்கிடக்கும் ஆதியின் கதையைப்போலவே,ரத்தமும் சகதியுமாக  சற்று குழப்பமாக ஓடினாலும்,பின்பாதியில் சற்று சுதாரித்து ,ஆதியின் நெருங்கிய நண்பன் மகனின் கையிலேயே,ஆதியைக்கொல்ல ஊர்க்காரர்கள் அரிவாள் கொடுப்பது,போன்ற  சில செறிவான காட்சிகளால் திரைக்கதையை சற்று நிமிர்த்தி உட்கார வைக்கிறார் வசந்த பாலன். பரத்-அஞ்சலி ஜோடிகள் கவுரவ வேடத்தில் நடிக்க முன்வந்ததை ஒட்டியாவது அவர்களை சற்று கவுரவமாக நடத்தியிருக்கலாம். அவர்களின்  ஐந்து நிமிடக் கதையை, கொத்துபுரோட்டா மாதிரி, பதினைந்து காட்சிகளாகப்பிரித்து கொத்தி எடுத்திருக்க வேண்டாம். அதிலும் இடுப்பு ஒட்டியாணம் யாருடையது என்று கண்டுபிடிக்க, ஆதி வேசியின் வீட்டுக்குபோவதும்,அங்கு அந்த வேசி ஆதியின் இடுப்பில் ஒட்டியாணத்தை வைத்துப்பார்த்து, தன்னைக்கட்டிப்பிடித்தவர்களையெல்லாம் ரீவைண்ட் செய்து,அந்த ஒட்டியாணம் ராஜாவுடையது என்று கண்டுபிடிப்பதும்,நாவலில் இருந்ததா,அல்லது வசந்தபாலன் இடுப்புஒட்டியாணம் பார்க்கும் ஆவலில் வைத்ததா என்பது தெரியவில்லை. அங்காடித்தெருவோடு ஒப்பிடும்போது, வெகு ஜன ரசிகனை ஈர்க்கும் சமாச்சாரங்கள் மிகக்குறைவாகவே இருக்கும் இந்த ‘அரவான்’ வசூலில் விரைவில் குறைவான் தான்.

உன் குத்தமா,என் குத்தமான்னு தெரியலை...ஒன்மோர் போகலாமா?

சேது’வின் க்ளைமேக்ஸ்-ல் விக்ரம் வாழ்க்கையே வெறுத்துப்போய் தானே மெண்டல் ஆஸ்பத்திரி வண்டியில் ஏறிவிடுவதுபோல், மொத்ததமிழகமும் ஏறிவிடலாமா என்று யோசிக்கிற அளவுக்கு ‘3’ படத்துக்கு பப்ளிசிட்டியைக் கிளப்பிவிட்டபிறகும் தனுஷ்-ஐஸ்வர்யா கோஷ்டியின் விளம்பர தாகம் அடங்கவில்லை.

இப்போது பழையபடி, இவர்களது பப்ளிசிடி ஸ்டார் ரஜினியின் பெயரை சூதாட்டத்துக்காக கையில் எடுத்திருக்கிறார்கள்.

தங்கள் வீட்டின் ஒரு அறையில் முதுகோடு முதுகு ஒட்டிக்கொண்டு ஆளுக்கு ஒரு போனில் நியூஸ்களுக்கு பேன் பார்க்கும்  இவர்களின் திருவிளையாடல்களைப்பார்க்க நல்லவேளை சிவாஜி கணேசன் உயிரோடு இல்லை.

ஒரு தினசரி நாளிதழுக்கு போன் போடும் தனுஷ், ‘’இந்த மேட்டர் யாருக்கும் தெரிய வேண்டாம்.ஏன் எழுதக்கூட வேண்டாம். நேத்து ரஜினி அங்கிள் படம் பாத்தாங்க. எக்ஸல்லண்ட்ன்னு சொல்லி என்னையும், ஐஸையும் கட்டிப்பிடிச்சிப் பாராட்டினாங்க. மறுபடியும் சொல்றேன். நீங்க இதை உங்க பேப்பர்ல எழுத வேண்டாம்’’ என்றபடி போனை வைத்துவிட்டாராம்.

உடனே அடுத்த நிமிடம் ,அதற்குப் போட்டியாக வரும் இன்னொரு தினசரி பெண் நிருபருக்கு போனைப்போட்ட ஐஸ்வர்யாவோ, ‘’அப்பா படத்தைப் பார்க்கவே இல்லை. அதற்குள்ளாக அவர் பார்த்ததுபோலவும், படத்தின் க்ளைமேக்ஸில் பாஸிடிவ் எண்டிங் வைக்கச்சொன்னது போலவும் சிலர் எழுதுகிறார்கள். ஏன் தான் இப்படி எழுதித்தொலைக்கிறார்களோ என்று தெரியவில்லை. இப்படி நான் சொன்னதாக போடனும்னு நினைச்சா போட்டுக்கோங்க’ என்கிறாராம்.

அவர்கள் விரும்பியது போலவே இருவிதமான செய்திகளும் வெளிவந்ததை ஒட்டி, இப்போது ரஜினி ‘3’ படத்தைப் பார்த்துவிட்டதாக பத்து பேரும், அவர் பார்க்கவில்லை என்று இருபது பேரும், அவரு பாத்துட்டு பாக்காதமாதிரி இருந்தார் என்று முப்பது பேரும் சதா ‘3’ படத்தைப்பற்றிப்பேசியே சட்டையைக்கிழித்துக்கொள்கிறார்களாம்.

அய்யா, அம்மா  பப்ளிசிட்டி அட்ராசிட்டிகளே, படம் ரிலீஸாகுறப்ப நாங்கஅதைப் பாக்குற கண்டிசன்ல இருக்குற மாதிரி எங்கள வச்சிக்கங்க. எல்லாருமே ஏர்வாடிக்குப் போயிட்டமுன்னா,தியேட்டர்ல பேருபாதி கூட தேறாது.

 **********************************************************

ஸ்டைலிஷ்  நடிகை, 20 க்கும் மேற்பட்ட பாடல்களைப்பாடியிருக்கும் பாடகி, முன்னணி நடிகைகளுக்கு டப்பிங் பேச ஆரம்பித்திருப்பது, கமலின் ‘விஸ்வரூபம்’ பட நாயகி,அடுத்து சிம்புவுடன் வெற்றிமாறனின்’வடசென்னை’யில் ஜோடி சேர இருப்பது என்று இவ்வளவு சமாச்சாரங்கள் கைவசம் இருக்கும்போது, யாராக இருந்தாலும், தன்னடக்கமாக இருப்பது கொஞ்சம் கஷ்டம் தான். அதுவும் ஆண்ட்ரியா மாதிரி ஒரு அல்ட்ரா மாடர்ன் அழகியிடம் தன்னடக்கம் பேசாமல் தன்னை அடக்கம் செய்துகொள்ளவேண்டியதுதான்.

நடிப்பு நமக்கு சைடிஷ்’ மாதிரி பாட்டு தான் எனக்கு மெயின் டிஷ்ஷே என்று கழுத்தில் போர்டு மாட்டாத குறையாக பேசிவந்த ஆண்ட்ரியாவின் போக்கில் சமீப காலமாக பாடுவது தொடர்பாக  ஒரு அலட்சிய மனோபாவம்.

இப்போது இசையமைப்பாளர்கள் மத்தியில் ஆண்ட்ரியாவின் ‘தன்னடக்கத்தைப் பற்றி தான் புகைந்து தள்ளுகிறார்கள். அதுவும் இவருக்கு அதிக வாய்ப்புகள் தந்த ஜீ.வி.பிரகாஷ்குமாரின் புலம்பல் தான் ரொம்ப ஜாஸ்தியாக இருக்கிறதாம்.

சங்கீதமே என் கதி என்று கிடந்த பாப்பாவின் மனசு சுதி விலகக்காரணமான சங்கதி என்னவோ மிக சாதாரணமானதுதான்.

முன்பெல்லாம் பாடுவதற்கு அழைத்தால்,’’ தேங்க் யூ சார். இதோ அரைமணி நேரத்துல வந்துடுறேன். நடிப்புல்லாம் எனக்கு பாட்டுக்கு அப்புறம் தான் சார்’’ என்று ஆலாய்ப்பறந்து ஓடிவந்த ஆண்ட்ரியா இப்போது பாடுவதற்கு இசையமைப்பாளர்கள் தொடர்பு கொண்டால், ‘’சாரி பாஸ் ரொம்ப பிஸி. நேர்ல வர நேரமில்ல. டியூனை எனக்கு மெயில் பண்ணுங்க. என்னோட வாய்ஸுக்கு பொருந்துமாதிரி தெரிஞ்சா அப்புறம் பாடுறதைப்பத்தி பேசலாம்’’ என்று இசையமைப்பாளர்களின் பிஞ்சு மனசில் நஞ்சு கலக்குகிறாராம்.அதைக்கேட்டு கீ-போர்டில் கை வைக்க மனசில்லாமல் தவிக்கிறார்களாம் சிலர்.

ஆனால் ஆண்ட்ரியா தரப்போ,’இப்பல்லாம் நிறைய பசங்க ஸ்கூல் முடிச்ச,பேக்கைக்கூட வீட்ல கொண்டுபோய் வைக்காம,   மியூசிக் டைரக்டர்னு சொல்லிக்கிட்டு இங்க வந்துடுறாங்க. நம்மள பாட வைக்கிற சாக்குல ஜொள்ளு விடுறவங்க எண்ணிக்கை ஜாஸ்தியாயிடுச்சி. சுதி சுத்தமா பாடுனாக்கூட ‘ உன் குத்தமா என் குத்தமான்னு தெரியலை ஒன் மோர் போகலாமான்னு கேக்குறாங்க. அதனால தான் டியூனை மெயில் பண்ணச்சொல்லி,சில பேரை அவாய்ட் பண்றோம்’ என்கிறார்கள்.

இதையும் தாண்டி மெயில் பண்ற பசங்க, ஃபெயில் ஆகாம பாத்துக்கங்க ஆண்டிரியா ஆண்ட்டி.